Steen Lyngep Mike Pompeo Københavnimi ataatsimeeqatigileraa

USA-p nunanut allanut tunngasunut ministeria, Mike Pompeo, Københavnimut pingasunngorpat tikissaaq.
USA-p nunanut allanut tunngasunut ministeria, Mike Pompeo, qeqqaniittoq, Danmarkimut tikissaaq. Toqqorsivimmit assi. Assi © : NATO North Atlantic Treaty Organization/Flickr Creative Commons
juulip 15-at 2020 12:36
Nutserisoq Hanne Petersen

USA-p nunanut allanut tunngasunut ministeria, Mike Pompeo, Københavnimut juulip ulluisa 22-anni tikissaaq. 

Danmarkip nunanut allanut tunngasunut ministerieqarfia tusagassiorfinnut taama nalunaaruteqarpoq. 

- Suleqatima Mike Pompeop atorfimminut atatillugu coronap ajornartoortitsinerani angalarpiarunnaarnermini Københavnimut tikeraartigisassatta tikilluaqqunissaanut qilanaarpunga, danskit nunanut allanut tunngasunut ministeriat Jeppe Kofod (S) tusagassiorfinnut nalunaarutiminni allappoq.

Nunanut allanut tunngasunut naalakkersuisoq Steen Lynge savalimmiormiullu nunanut allanut tunngasunut naalakkersuisuat Jenis av Rana, Mike Pompeop Københavnimut tikeraarnissaanut atatillugu aamma qaasarneqarput.

- Issittumut tunngasut aamma eqqartortussaagatsigit Kalaallit Nunaanni Savalimmiunilu suleqatikka soorunami aamma ataatsimeeqataassapput. Ataatsimeeqataanissaat pingaartittorujussuuara, Kofod oqarpoq.

Nunatsinnut siorna ataatsimiigiarnissaraluani taamaatikkaa

Mike Pompeo Kangerlussuarmut 2019-imi maajip qaammataani tikeraarnissaraluaniit ukioq ataaseq qaangiuteriillartorlu Københavnimut tikissaaq.

Taamanikkut ataatsimeeqatigisassaralui tassaapput Ane Lone Bagger (S), taamanikkut nunanut allanut tunngasunut naalakkersuisoq aamma Anders Samuelsen (LA), danskit nunanut allanut tunngasunut taamanikkut ministeriat.

Mike Pompeolli tikeraarnissani Washington D. C.-mi nukinginnarluinnartunik taamanikkut suliassaqarnini peqqutigalugu tikinnissaminut aqaguttoq taamaatikkaa, Namminersorlutik Oqartussat taamanikkut ilisimatitsipput. Tikeraarnissaali taamaatinneqarani piffissaligaanngitsumik kinguartinneqartoq, aamma ilisimatitsissutigaat.

AAMMA ATUARUK Ane Lone Bagger Pompeop ataatsimeeqatigereernerani: Ingerlalluartorujussuuvoq

Qaammatit marluk qaangiummata, USA-p præsidentiata Donald Trumpip Københavnimut septembarip qaammataani tikeraarnissani aamma taamaatippaa. Naalakkersuisut Danmarkimilu naalakkersuisut Donald Trump nunatsinnik pisiarinnikkumaneranut itigartereeraallu taama pisoqarpoq.

Danskit ministeriunerata Mette Frederiksenip (S) tamanna isumaqanngilluinnarnerarpaa. Taama oqarnera Trumpip Danmarkimut tikeraarnissaraluani piffissaligaanngitsumik kinguartikkini Twitterikkut allanneranik kinguneqarpoq. 

USA-p præsidentia Danmarkimut suli tikeraanngilaq.