Steen Lynge: 30-nik soraarsitsineq akisussaassuseqarluni iliorneruvoq
Air Greenland sulisitsisutut akisussaassuseqarluni iliorpoq, tamannalu politikerit akuliuffigisinnaanngilaat, timmisartuuleqatigiiffiup sulisuminik 30-nik soraarsitsinera pillugu Steen Lynge taama oqarpoq.
Soraarsitsinerit pereersut ullut arlallit qaangiummata, Kujataani angallannikkut pissutsit nalorninartorsiutigineqarnerat Angallannermut naalakkersuisup Steen Lyngep aatsaat oqaaseqarfigerusulerpai.
Nipaappallaarnerartilluni Aqqaluaq B. Egedemit toqqaannartumik isornartorsiorneqareerluni Steen Lynge ataasinngormat oqaaseqarpoq.
VIDEO Steen Lynge soraarsitaasut ilaannut suliffissanik neriorsuuteqarpoq
Illuatungiulittup Naalakkersuisut kanngunarnerarpai, innuttaasunik ernumasunik angallannikkut periarfissanik aammalu suliffinnik pisariaqartitsisunik tusaaniagaqarpallaannginnerarlugit.
Steen Lyngep tamatumunnga tunngatillugu oqaatigaa, isumaqatigiinniarnerit suli ingerlanneqarneri pissutigalugit oqaaseqarfigisinnaasimanagit.
AAMMA ATUARUK Aqqaluaq B. Egedep Angallannermut Naalakkersuisoq ujartorpaa
Steen Lyngep ilanngullugu oqaatigaa Air Greenland ataatsimeeqatigineqartussasoq, Inatsisartunilu ataatsimiititaliaq susassaqartoq suliap ingerlanneqarneranik ilisimatinneqarumaartoq.
- Ataatsimiititaliaq tamatumunnga isummertussaq tassaavoq Inatsisartut Aningaasaqarnermut Akileraartarnermullu ataatsimiititaliaas. Ataatsimiititaliarlu taanna Inatsisartut suleriaasiat naapertorlugu ilisimatinneqartussaavoq, Steen Lynge oqarpoq naqissuserlugulu:
- Isumaqatigiinniarnerni Inatsisartut aningaasaliissutaat 120 millionit koruunit sinnilaarlugit aningaasartaqartut aallaavigineqarput.