Aqqaluaq B. Egedep Angallannermut Naalakkersuisoq ujartorpaa

Air Greenlandip suliffiit 30-t atorunnaarsippai, Naalakkersuisullu nipangersimaannarput. Attaveqarnermut Naalakkersuisoq, Steen Lynge, sapaatit-akunnera kingullerli KNR-imut nassuiaateqarusussimanngilaq.

Aammattaaq naalakkersuisooqatigiinnut ilaasortat arlallit oqaaseqarusussimanngillat.

Inatsisartuni illuatungiulittuneersup Aqqaluaq B. Egedep (IA) ippassaq tamanut ammasumik tusagassiorfinnut allagaqarluni nassuiaasoqarnissaa maanna suaartaatigilerpaa.  

- Massakkulli ujartorpara naalakkersuisooqatigiit suniarnertik, aamma sooq Kujataani angallannikkut pissutsit periarfissaarutivinnissaannik siunertaqalersimanertik nassuiassagaat, Aqqaluaq B. Egede allappoq. Taanna aamma isumaqarpoq naalakkersuisooqatigiit innuttaasunut ernumasunut taamatut nipangersimaniaannarnertik kanngusuutigisariaqaraat.

AAMMA ATUARUK   Air Greenland: Soriarsinnaanngilagut  

Suliffissaaleqinerup annertusiartuinnartup kingunerisinnaasai Aqqaluaq B. Egedep aamma mianersoqqussutigai, isumaginninermullu aningaasartuutit aammalu akileraarutitigut isertitassatigut periarfissat taallugit.

Sulisunik 30-nik soraarsitsineq Kujataanut annertuumik sunniuteqassapput, Aqqaluaq B. Egede isumaqarpoq.