Air Greenland: Soriarsinnaanngilagut

Kujataani angallannerup aappaagu januaarip aallaqqaatani ilusissaanut atatillugu Kommune Kujallermi borgmesteri Jørgen Wæver Johansen Air Greenlandimik isornartorsiuivoq. Isornartorsiuinissamulli pissutissaqanngitsoq, Air Greenlandip tuniniaanermut pisortaata Christian Keldsenip oqaatigaa.

Kommune Kujallermi borgmesteri KNR-imut tallimanngormat oqaaseqarumanngilaq, qarasaasiakkulli attaveqaqatigiittarfikkut Facebookikkut allappoq. Air Greenlandip sulisuni sallunaaveeqqutitut atorai ilaatigut oqaatigaa.

 

AAMMA ATUARUK VIDEO Air Greenlandimi sulisup soraarsitaanini quarsaarutigaa

Kommune Kujalliulli borgmesteriata oqaaseqarnerminut tunuliaqutai kukkusut, Air Greenlandip tuniniaanermut pisortaata oqaatigaa.

- Timmisartut kisiisa atorlugit angallassisoqalernissaa pillugu isumaqatigiinniartoqanngilaq, kisianni immakkut silaannakkullu angallassisoqarnerulernissaq isumaqatigiissutiginiarneqarluni, Christian Keldsen Radioaviisimut oqarpoq, nangillunilu:

- Immakkut silaannakkullu angallassisalernissaq pillugu neqerooruteqarsinnaanermut periarfissaqarsinnaasimanngilagut, timmisartulli taamaallaat atorlugit angallassinissamut neqerooruteqarsinnaasimalluta, tamannali periarfissatut isigineqarnikuunngisaannarpoq. Timmisartut kisiisa atorlugit angallassisalernissaq pillugu isumaqatigiinniarnerni saqqummiussisoqarsimanngilaq, Keldsen oqarpoq.

 

AAMMA ATUARUK Soraarsitsisoqarnissaa piffissami sivisuumi ilisimaneqarpoq

Tuniniaanermut pisortap oqaasii neqeroorutiginiakkanut naapertuupput. Air Greenlandimmi sulisunik 30-nik soraarsitsiniarnera immakkut silaannakkullu angallassisalernissamut eqqarsaammut naapertuuttoq, taassuma oqaatigaa.

Kujataani angallannerup januaarip aallaqqaataani ilusissaa akerleralugu Qaqortormiut Nanortalimmiullu tallimanngormat akerliussutsiminnik takutitsipput.