VIDEO Steen Lynge soraarsitaasut ilaannut suliffissanik neriorsuuteqarpoq
Attaveqarnermut naalakkersuisup, Steen Lyngep, soraarsitaasut ilarpassui suliffissaannik maanna neriorsorpai.
- Suliaq siunissami Air Greenlandimit ingerlanneqarunnaarluni Mittarfeqarfinnit ingerlanneqartussaavoq, soraarsitaasullu 30-iusut ilaannik atorfinitsitsisoqassaaq.
- Taamaammat pineqartut 30-t tamakkerlutik suliffissaarutissanngillat. Ilaammi Mittarfeqarfiit ataanni atorfinittussaassapput, Steen Lynge KNR-imut oqarpoq.
Agguaariaasaq 75/25 atorneqassaaq
Qaqortormiut Nanortalimmiullu soraarsitsinerit qulimiguulimmillu kiffartuussiunnaarnissaq akerleralugit akerliussutsimik takutitseqqammerput. Illoqarfigisaasalli qulimiguulinnik kiffartuunneqaannarnissaannik neriorsorneqarput.
- Paasissutissat pissarsiarisagut naapertorlugit, Naalakkersuisut anguniagaat tassaavoq angallannerup 75 procentia qulimiguulimmik ingerlanneqassasoq 25 procentialu imaatigut ingerlanneqassalluni, tamannalumi Kujataani kissaatigisatsinnut naapertuulluinnarpoq.
AAMMA ATUARUK VIDEO Air Greenlandimi sulisup soraarsitaanini quarsaarutigaa
- Taamaammat Air Greenland angallannikkut kiffartuussinissamik isumaqatigiissuteqarfigineqanngikkaluarpalluunniit mittarfiit matuneqassanngillat, Simon Simonsen tallimanngormat akerliussutsimik takutitsisoqarmat taama oqarpoq.
Silaannakkut angallatitigullu angallassisoqassaaq
Attaveqarnermullu naalakkersuisup Steen Lyngep tamanna Qanoruumi ataasinngormat unnukkut apersorneqarluni uppernarsarpaa.
- Isumaqatigiissutinut tunngatillugu kommunit tusarniaaffigineqarput. Kommune Kujalliup anguniagaa malinniarparput timmisartukkullu imaatigullu angallatinik angallassinissaq sulissutigalutigu.
