Sri Lankap præsidentiata, Maithripala Sirisenap, islamisiortut poorskimi saassussinissaannik mianersoqqussuteqartoqarneranik ilisimatinneqarsimanani oqaatigaa.Assi: Sudath Silva/Flickr Creative Commons

Sri Lankap præsidentiata illersornissaqarfimmi siuttut soraarsinniarai

Sri Lankap præsidentiata islamisiortut qaartartumeerinissamik pilersaaruteqarnerinik paasisanik apuussivigineqarsimannginnini pissutigalugu illersornissamut qullersaqarfimmi siuttut soraarsinniarpai.

Sri Lankap præsidentiata, Maithripala Sirisenap, islamisiortut poorskimi saassussinissaannik mianersoqqussuteqartoqarneranik ilisimatinneqarsimanani oqaatigaa.

Illersornissamullu qullersaqarfimmi siuttut piaartumik taarserneqassasut marlunngornermi oqaatigaa.

Akunnittarfiit oqaluffiillu saassunneqarnerini ajunaartut marlunngornermi 321-t anguaat. Taakku ilagaat meeqqat Danmarkimeersut pingasut.

- Politiini sakkutuullu isumannaallisaasuini sapaatit akunnerini aggersuni allanngortiterilluinnassaanga. Illersornissamut oqartussani siuttut nalunaaquttap akunneri 24-t qaangiutsinnagit taarsissallugit naatsorsuutigaara, Sirisena tv-kkut oqalugiarluni taama oqarpoq.

Paasissutissat ilaatigut nutaarsiassaqartitsivimmit Reutersimit pissarsiani tunngavigalugit taama iliorniarpoq.

Oqaluffiit akunnittarfiillu poorskip sapaataani qaartartumeerneqarnissaat nalunaaquttap akunnerinik arlaqanngitsunik sioqqullugu qanoq pisoqalerneranik Indiamit ilisimatinneqarsimallutik Sri Lankami isertortumik paasiniaasartut nutaarsiassaqartitsivimmut oqaatigaat.

Reutersip Sri Lankami tusarfiit pingasut suliamut toqqaannartumik ilisimasallit issuarpai.

- Isumannaallisaanermi pisortat nunamit allamit mianersoqqussummik tigusaqartut uannut apuussaqanngillat. Naleqquttumik iliuuseqarfigineqarsimassagaluarput, præsidenti oqarpoq.

- Pisortat pineqartut sakkortuumik iliuuseqarfiginiarlugit aalajangerpunga.

Oqaluffiit pingasut akunnittarfiillu sisamat imminut pilliutigitigalutik qaartartumeerisunit sapaatiummat ullaakkut eqqugaapput, toqusullu marlunngormat 321-t anguaat. Toqutaasut ilagaat meeqqat Danmarkimeersut pingasut. Ikiligaasut 500-t missaanniipput.

Sri Lankami nunap inuisa sorsuunnerat ukiut qulit matuma siorna soraarpoq, tamatumalu kingorna nuna amerlanertigut eqqisseqatigiiffiuvoq. Taamaammat pisoq nunami quarsaartitsivoq.

AAMMA ATUARUK Sri Lankami toqutaasut suli amerliartortut

Poorskip sapaataani saassussineq akisussaaffigalugu Islamisk Statip nalunaarutigaa. Taamaattoqarnerali suli uppernarsarneqarsinnaasimanngilaq.

Indiami isertortumik paasiniaasartut pisortaat saassussisoqarnissaa nalunaaquttap akunnerinik marlunnik sioqqullugu Sri Lankami oqaluffinnut saassussisoqarsinnaaneranik mianersoqqussuteqarput.

Sri Lankami illersornissamut qullersaqarfimmi tusarfik taama oqarpoq.

Illersornissamullu qullersarfimmi tusarfiup allap ilisimatitsissutigaa mianersoqqusineq saassusineq siulleq nalunaaqquttap akunnerinik arlalinnik sioqqullugu pisoq.

Tusarfillu alla oqaluttuarpoq arfininngormat unnukkut Indiamit mianersoqqusisoqartoq.

Indiami naalakkersuisunit tusarfiup Reutersimut oqaatigaa Sri Lankami isertortumik paasiniaasartut apriilip sisamaani 20-anilu assingusumik aamma nalunaarfigineqarsimasut.

Sri Lankami nunanut allanut ministereqarfik præsidentillu allaffeqarfia paasissutissat oqaaseqarfiginissaannut noqqaassummut akissuteqarsimanngillat.

Sri Lankami illersornissamut ministerip tulliata marlunngornermi siusinnerusukkut oqaatigaa oqaluffinnut akunnittarfinnullu saassussineq New Zealandimi muslimit 50-it inuiaassutsimik pingaartitsisumit qaamasumik amilimmit toqutaanerannut akiniaanerusoq.

Premierministerillu Ranil Wickremesinghep tusagassiortunik katersortitsinermi oqaatigaa New Zealandimi toqoraasoqarneranut atassuteqaratarsinnaasoq.

Naliliisartulli immikkullu ilisimasallit tamanna qularaat. Taakku oqaatigaat Sri Lankami saassussinerit ataqatigiissagaalluarmata taamalu sakkortutigimmata, piffissami sivisuumi piareersarneqarsimassasut.

Wickremesinghellu oqaatigaa ingasaassinianik sakkulinnik qaartartuutilinnillu suli peqarsinnaasoq, taamaattumillu  suli aarlerinartoqarsinnaasoq.

/ritzau/Reuters

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat