Spiermannip Pituffik pillugu nassuiasiaa piareeerpoq
Amerikamiut suliffeqarfiutaata Exelis Servicesip Pituffimmi kiffartuussinissamik isumaqatigiissuteqarnissaata tungaanut pisimasunik nassuiaat utaqqisaaqisoq piareerpoq.
Nassuiaat Naalakkersuisut siulittaasuata naalakkersuisoqarfiani taamani pisortaasumit, Svend Hardenbergimit, eqqartuussissuserisumut Ole Spiermannimut suliakkiutaavoq, taassuma sumi kukkusoqarsimanera paasinarsisissallugu.
Inuit pingasut
Ingammik inuit pingasut suliami matumani soqutiginartuupput. Tassalu Naalakkersuisut taamani siulittaasuat, Aleqa Hammond, naalakkersuisoqarfimmi taamani pisortaasoq, Svend Hardenberg, aamma nunanut allanut tunngasunut pisortaq Kai Holst Andersen.
Aamma atuaruk Ole Spiermann Pituffimmut kiffartuussinissamut isumaqatigiissummut atatillugu misissuisinnaavoq
Nassuiaasiorniarneq tatiginninnginnermik sunnersimaneqaqqaarpoq, Ole Spiermannilu piukkunnarnersoq, Kai Holst Andersenip Danmarkimi eqqartuussissuserisut kattuffiannut misissortippaa. Tassami Ole Spiermann Pituffimmi suliariumannittussarsiornermi Greenland Contractorsip eqqartuussissuserisoraa, taavalu Namminersorlutik Oqartussat arlaannaannulluunnit attuumassuteqanngitsumik misissuititsinerani aamma suliarinnittuulluni. Eqqartuussissuserisulli kattuffiat oqarpoq, piukkunnassusia apeqquserneqartariaqanngitsoq.
Nassuiaatilli saqqummiunneqarnissaa uatsi aatsaat pissaaq
Tassalu Ole Spiermannip nassuiaasiani Naalakkersuisut siulittaasuannut, Kim Kielsenimut, aamma nunanut allanut tunngasunut naalakkersuisumut, Vittus Qujaukitsumut marlunngormat tunniuppaa. Naalakkersuisoqarfinni pisortat qullersaat, Søren Hald Møller, KNR-imut taama oqaluttuarpoq.
Taava nassuiaatip ilimagineqartutut tamanut saqqummiunneqannginnerani, naalakkersuisut taakkua marluk atuarnissamut inuillu nassuiaasiornerup suliarinerani peqataasimasut ilisimatinnissaannut piffissaqaqqaassapput, Søren Hald Møller nassuiaavoq.
Aamma atuaruk Spiermannip suliassai saqqummiunneqarput
Nassuiaatilli tassuugunnguaq saqqummiunneqarnissaa naatsorsuutigineqarsinnaanngilaq, Vittus Qujaukitsoq sulinngiffeqarmat Kim Kielsenillu dronning Margrethe angalaqatigimmagu.
