Ole Spiermann Pituffimmut kiffartuussinissamut isumaqatigiissummut atatillugu misissuisinnaavoq

Arlaannaannulluunniit attuumassuteqanngitsumik inatsisilerituumut misissuititsinertut taasaq Naalakkersuisunit suliassanngortitaq, suliffeqarfiup Namminersorlutik Oqartussanit piginneqataaffigineqartup Greenland Contractorsip Pituffimmi kiffartuussinissamik isumaqatigiissummik Exelis Servicesimut amerikamiunit pigineqartumit annaaneqartumut pisunut qulaajaanissaq nangeqqinneqarpoq. Misissuinerullu inatsisilerituumit Ole Spiermanimit aqunneqarnera ingerlaannassaaq.
Assi © : Toqqorsivik/Arkiv
Allattoq Hagen Højer Christensen, Nauja Møller
maajip 01-at 2015 13:33

Tamanna Danmarkimi advokatnævnip inatsisilerituup isumaginnissinnaanera qulakkeermagu nangeqqinneqarpoq. Isumaqarluni Spiermannip Greenland Contractorsimut sullissinera Namminersorlutillu Oqartussanut inatsisilerituutut misissuititaanera imminnut akerleriinngitsut.
Advokatnævnip naliliineranit saqqummerpoq Namminersorlutik Oqartussani sulisumit Spiermannip isumaginnissinnaaneranut apeqqusiisoqarsimasoq, taassumalu apersorneqarusussimanngilaq suliamullu tunngasunut allagaatit tunniukkumasimanagit. Sulisoq taanna danskit nunanut allanut tunngasunut ministereqarfiata amerikamiullu akornanni isumaqatigiinniarnernut peqataasimasoq, isumaqarlunilu Spiermannip Greenland Contractorsimut Namminersorlutillu Oqartussanut inatsisilerituutut atuuffeqarluni sulinerata imminnut akerleriittut.
Advokatnævnilu naapertorlugu suliamut misissuisitsinerup ingerlanerani sulisup Spiermannimut allagaatit pisariaqartitat tamaasa tunniutissagai aammalu apersorneqassasoq Namminersorlutik Oqartussat piumasarisimavaat.
Advokatnævnillu taamaattumik nalilerpaat, Spiermannip misissuisitsineq suliariinnassappagu imminnut akerleriittumik sulisoqarnavianngitsoq taamaattoqarnissaanullu aarlerinartoqanngitsoq. Suliaq Juunip ingerlanerani naammassissangatinneqarpoq.

Nutaarsiassami kukkunermik nassaarsimaguit uunga allaffigineqarsinnaavugut.

Aamma atuaruk