Specialklasseni atuartut ilinniagaqarsinnaasariaqarput
Naalakkersuisulli suli ilisimaqqissaanngilaat inuusuttut atuarfimmiit aninermik kingorna ilinniakkamik aallartitsisimanngitsut qasserpiaanersut.
Meeqqat inuusuttullu atuartitsinermi naliginnaasumi malinnaasinnanngitsut specialklasseni atuartinneqartarput. Taakkuli aamma siunissami ilinniagaqarsinnaanissaat aqqutissiuunneqartariaqartoq, Naalakkersuisut isumaqarput.
Apeqquteqaat tunngavigalugu oqallinnissamik siunnersuuteqartuuvoq IA-meersoq Debora Kleist taassumalu Naalakkersuisunut apeqqutigaa inuusuttut specialklasseniittut ikiorniarlugit qanoq pilersaaruteqartoqarnersoq.
- Piffissami qaninnermi Naalakkersuisut misiliummik ingerlatsilersaarput, inuusuttut ajornartorsiutillit ilinniakkamik aallartitsinissamut periarfissinnissaat sulilernissaalluunniit siunertaralugu, ilinniartitaanermut Naalakkersuisoq Palle Christiansen akissuteqaammini allappoq.
Upernaaq manna Inatsisartut katersorneranni IA-meersoq Olga P. Berthelsen siunnersuuteqarpoq meeqqat, inuusuttut inersimasullu ADHD-mik autisme-millu nappaatillit ikiorneqarnissaat pillugu Naalakkersuisut pilersaarusiussasut. Siunnersuut taanna akuerineqarpoq.
Siumumeersoq Karl Lyberth aamma siunnersuuteqarpoq meeqqat ADHD-qartut angajoqqaavisa qanigisaasalu pikkorissartinneqarnissaannut aningaasaliisoqassasoq. Siunnersuut taanna aamma akuerineqarpoq.
Debora Kleistip apeqquteqaat tunngavigalugu oqallisissatut siunnersuutaa ullumi Inatsisartuni oqaluuserineqassaaq.