Spania: Jerusalemip kangisissortaa Palæstinami illoqarfiit pingaarnerissavaat

Palæstinap naalagaaffittut akuerineqarnissaa Spaniap tapersersorpaa, Gaza Vestbreddenilu tassunga ilaallutik, Jerusalemillu kangisissortaa Palæstinami illoqarfiit pingaarnerissavaat.

Spaniami ministeriuneq Pedro Sánchez Spaniami tv-kkut aallakaatinneqartukkut ullumi marlunngornermi oqalugiarami taama nalunaarpoq.

Palæstina naalagaaffittut Spaniamit pisortatigoortumik sisamanngornermi akuerineqassaaq.

Norge Irlandilu Spaniatut iliorlutik Palæstina naalagaaffittut aamma akueriniarpaat.

Palæstina naalagaaffittut akueriniarlugu Norgep, Irlandip Spaniallu sapaatit akunnerata siuliani nalunaarutigaat.

Nutaarsiassaqartitsivik Ritzau taama allappoq.

Killeqarfiit 1967-imi Seksdageskrigenip kingorna atuutilersut allanngortinneqarnissaat tapersersorumanagu Pedro Sánchezip oqaatigaa.

Israelimiulli Palæstinamiullu allanngortitsinissamik aatsaat isumaqatigiippata tamatumunnga tapersersuissalluni oqarpoq.

- Palæstinap naalagaafffitttut akuerineqarnissaa oqaluttuarisaanermi naapertuilluartuliorneruinnanngilaq. Tunngaviusumik aamma pisinnaatitaaffiuvoq, Sánchez oqarpoq.

Arlaannaannulluunniit tamanna akerliliinerunngilaq, minnerunngitsumik Israelimut, taanna oqarpoq. Nutaarsiassaqartitsivik AFP taama allappoq.

Spaniap Palæstinap naalagaaffittut akuersinerani Spania islamisiortunik Hamasimeersunik aamma illuatungiliisoq, Sánchezip erseqqissaatigaa. Hamasikkummi Israelimik siorna oktobarip ulluisa arfineq-aappaanni saassussimmata Israelip Hamasillu akornanni sorsuttoqalerpoq.

Spaniap, Irlandip Norgellu Palæstinap naalagaaffittut akuersineranni nunat allat aamma taamaaliussasut, nunat pingasut taakku neriuutigaat.