Sorsunnermi tigusaasimasunik 100-likkaanik ullumi Ukraine Ruslandilu paarlaasseqatigiipput
![](/sites/default/files/styles/image_934x467/public/2024-08/20240824-161344-L-3700x2476ma.jpg?itok=XFB5tmk5)
Rusland Ukrainelu ullumi arfininngornermi sorsunnermi tigusaasunik 230-inik paarlaasseqatigiipput. 115-it nunanit marluusunit.
Tamanna Ukrainep præsidentianit, Volodomyr Zelenskyj-mit aamma Ruslandip illersornermut ministeriaqarfianut arfininngormat ullup qeqqata missaani uppernarsarneqarpoq.
Isumaqatiginninniarnerit Emirateqarfiit Kattuttut Araberiusut aaqqissugaanni sorsunnermi tigusanik paarlaassisoqarnissaa nunat isumaqatigiissutigaat.
Reutersimut Emirateqarfinniit oqaaseqartartoq ilisimaneqanngitsoq oqaluttuarpoq.
Ruslandip iluanut qaammatip aallartinnerani Ukrainep sakkutuui isaammata sorsunnermi tigusarineqarsimasunik siullermeerluni Ruslandip Ukrainellu akornanni paarlaasseqatigiittoqarpoq. Ukrainemi sorsunnerup aallartinneraniilli siusinnerusukkut paarlaassisoqartarsimavoq.
Sorsunnerup aallartinneraniilli Emirateqarfiit Kattuttut Araberiusut isumaqatiginniartarfigisimasaanni 2022-miilli nunat akornanni tigusanik paarlaasseqatigiinnerit arfineq aappassarivaat.
Ullumi arfininngornermi tigusat aniguisitaasut 1.788-inngorput, tassa ullumi aniguisitaasut ilanngullugu, taamatullu pisoqarneranut Emiratit aaqqissuisuupput.
Marlunngornikkut aggustip arferngani Ukrainemi sakkutuut russit nunaata ilaanut Kurskimut saassussipput. Ruslandillu nunataanut aatsaat taamak sorsunnersuup aappaanisulli taama saassussisoqarpoq.
Ukrainep killeqarfia qaangerlugu sakkutuunik titusindtilikkaanik 2022-miilli Russit isaatitsisimapput.
/ritzau/Reuters/