Ruslandip Kina peqatigalugu Issittumut siooranartuunerarneqarnini ilumuunnginneraraa
Issittup aalaakkaasumik patajaatsumillu inissisimanissaata Ruslandip Kinallu Issittoq pillugu suleqatigiinnerulernerannit sunnerneqarsinnaaneranut USA-p pasilliutaa, Ruslandip akuersaarumanagu ullumi oqaatigaa. Nutaarsiassaqartitsivik Reuters taama allaaserisaqarpoq.
Ruslandip nunanut allanut tunngasunut ministereqarfiata oqaaseqartitaa Maria Zakharova, USA-p Issittoq pillugu periusissiaanut atatillugu ima oqaaseqarpoq:
- Periusissiap uuma Issittumi pissutsit najummassimanartorsiortinnerulerpai, Maria Zakharova oqarpoq.
- Pentagonimit periusissiaq nutartigaq, Natop Washingtonimi (qaammammi matumani) ataatsimeersuarnerani aalajangiunneqartoq, USA-p Issittumi inissisimanera sakkortuumik pisoqartussaaneranik eqqarsarnermik tunngaveqarpasippoq, soqutigisaanillu qulakkeerinninniartoorpasilluni, taanna oqarpoq.
”Akerleriinniarpaluffiusoq”
USA-p periusissiaa nutaaq akerleriinniarpaluffiusoq Kremlip oqaaseqartartua Dmitrij Peskov marlunngormat oqarpoq.
Ruslandip saniatigut Issittumi naalagaaffiit tassaapput: USA, Canada, Danmark/Kalaallit Nunaat, Norge, Sverige, Island Finlandilu. Tamarmik Natomut ilaasortaapput.
USA-p illersornissamut ministeriata tullersortaata, Kathleen Hicksip amerikamiut Issittumut periusissiaat ataasinngormat saqqummiuppaa. Rusland Kinalu ataatsimoorlutik Alaskap sineriaata ungasinngisaani sungiusarnernik ingerlataqartut tassani oqarpoq. Silap pissusaata allanngoriartornera sikukinnerulersitsimmat, Alaskap avataani sungiusartoqarsinnaavoq.
