Sorsunnermi pinerluuteqarsimasunut nunat tamalaat eqqartuussiviat allaffimmik Kyivimi ammaasoq

Sorsunnermi pinerluuteqarsimasunut nunat tamalaat eqqartuussiviat, ICC, Ukrainep illoqarfiisa pingaarnersaanni Kyivimi allaffimmik ammaavoq.

Russit Ukrainemi sorsunnermi pinerluuteqartarsimanerarneqarnerat misissuiffigineqarnissaa pillugu taamaaliortoqartoq Ukrainep præsidentia Volodymyr Zelenskyj sisamanngornermi oqarpoq.

Ukrainep innuttaasuisalu sorsunnermi anniaateqarsimaqisut naapertuilluartumik iliuuseqarfigineqarnissaat pillugu misissuisoqassasoq præsidentip oqaatigaa.

Sorsunnermi pinerluuteqarsimasunut nunat tamalaat eqqartuussiviata Kyivimi allattoqarfeqalerneratigut russit Ukrainemi sorsunnermi pinerluuteqartarsimaneragaanerisa misissuiffigineqarnissaat pillugu alloriarnerit taamaasillutik ilaneqarput.

Russit siuttuisa eqqartuussivitsigut pineqaatissinneqarnissaat pingaarnertut suliassaralugu allattoqarfik ICPA Ukrainemi siusinnerusukkut sulilerpoq. Ukrainemi unnerluussisussaatitaaneq Andrij Kostin, ICPA-p ammarneqarnerani tusagassiortunik katersortitsinermi ilaatigut oqarpoq.

ICPA assigiinngitsunit suleqatigiiffiuvoq, sorsunnermi pinerluuteqarsimasunut nunat tamalaat eqqartuussiviat, EU Ukrainelu tassani ilaatigut suleqatigiipput.

Allattoqarfiup misissuinerni katersugai eqqartuussivitsigut kingusinnerusukkut suliassani atorneqartussatut naatsorsuutigineqarput.