Sondre Slettemark ukiuunerani OL-eqarnerani malersuunnermut annguppoq

21-nik ukiulik Sondre Slettemark ukiuunerani Italiami OL-qarnerani sisoraaserluni ooqattaasarnermi malersuunnermut annguteqqarpoq.  Danmark sinnerlugu peqataasumik sisoraaserluni ooqattaasarnermi malersuunnermut aatsaavissuaq annguttoqarpoq.

Peqataasunit 90-init siulliit 60-it malersuunnermut anngupput Sondre Slettemarkilu normu 60-tut inissippoq.

Ullumikkut unamminermi 10 kilometerimut unammisoqarpoq marloriarluni ooqattaasartoqarluni. Sondre Slettemark pallungalluni seqqornermi ataasiarluni uniorpoq taamatullu nikorfalluni seqqornermi ataasiarluni uniorluni. Uniornerit tamarmik pillaatitut nerngallattarfikkoornermik naleqartarmata tassani sekundit pingaaruteqarluinnartut annaaneqartarput.

- Apuukkamma ilimasukkunnaaqqagaluarpunga. Seqqornera malersuunnermut anngunnissamut naammanngikkaluarpoq. Illinertigulli ingerlalluaqaanga pisarninniit sukkanerusumik ingerlallunga. Assorujussuaq pissanganarpoq, Sondre Slettemark KNR-imut oqarpoq.

Sondre Slettemark aallartut tulleriinneranni 29-ulluni aallarpoq taamalu eqqissiallannisami tungaanut unammeqataasut tamarmik apuunnissaannut utaqqisariaqarluni.

Utaqqineq ilungersunartoq

- Utaqqineq ajorluinnarpoq. Anngunnissannut ilimasukkunnaavikkaluarama. Apuuttussap kingulliup apuunnissaa utaqqivarput. Angusat isigalugit pissanganarluinnarpoq ataatagalu tassani malinnaaqatigivara, Sondre Slettemark oqaluttuarpoq.

Sapaatiuppat unammeqqissapput tassanilu angutit 12,5 kilometerimut malersuutissapput.

Illugiinnut ingerlasinnaavoq. Angusatigut appariaallattoqarsinnaavoq imaluunnit pitsanngoriartoqarluni tassanilu seqqornerit apeqqutaalluinnaqqittussaapput. Tallimanngornermi angusat aallaavigalugit unammisut aallarassapput seqqornermi tattoqisaattoqarsinnaalluni.

- Naliginnaasumik misigisimasarpunga ataatsikkut aallaqateqarlunga toqqaannartumik allanut unamminermi seqqorluarnerullungalu ingerlalluataarnerusarlunga allaanerusarami piffissalersuuserluni tulleriiaarluni aallarneq, Sondre Slettemark oqarpoq.

- Ingerlaarnissarput nuannissaqaaq neriuppungalu inissinnerni pitsanngoriarsinnaassallunga tamannali iluatsinngippat ajunngilaq, malersuunnermut annguppunga tamannaavorlu anguniagara, Sondre Slettemark oqarpoq.

Sondre Slettemarkip aleqaa Ukaleq Slettemark arfininngornermi unammissaaq