Ukiuunerani OL-eqarnerani Ukaleq Slettemark nunarsuarmi kakkannerpaat nallerlugit ooqattaasarpoq

Ukiuunerani OL-eqarnerani sisoraaserluni pingasunngornermi ooqattaasarnermi Danmark sinnerlugu unammeqataasut marluupput

Katillugit 20-riarluni seqqornermi Ukaleq Slettemark 19-eriarluni eqquivoq nunarsuarmi tusaamasat arlaleriarlutik uniortut. Uniorneq ataaseq minutsimik ataatsimik ilasiffiusarmat inissinnerni apparsaataavoq. Tamatumali tulluusimaarnera allanngunngilaa.

- Ukioq manna sisoraatinik ingerlalluarnerpaaffigisama una ilagaat ukioq mannalu aatsaat taama ooqattaasarluartigalunga. Allamik eqqarsariarsinnaannginnama assut naammagisimaarinnippunga, Ukaleq Slettemark unammineq naammassitsiaannartoq KNR-mut oqarpoq.

Imminut tatigilluarpoq

Imminut tatigilluarami ooqattaasarnermini toqqissisimalluarpoq.

- Ooqattaasarnermi assut toqqissisimavunga aamma imminut tatigisorujussuullunga. Piareersarluarsimavunga eqqarsartaatsikkut piareersarlunga  sisoraateqanngikkaluarlunga aamma seqqortaarluarlunga taamalu qanoq iliornissara nalornisiginngivillugu, Ukaleq Slettemark oqarpoq.

Sisoraaserluni ooqattaasarfiusoq immap qaavaniit 1.600 meterinik qatsinnerusumiimmat silaannaap annikinnera unammeqataasut pikkunanaarpaat. Apuuffik aqqutigereerlugu arlallit apummut nallartarput qasugaluarlutik tamaviaarsimanermut. Taamatullu Ukaleq Slettemark aamma iliorpoq.

- Qasulluinnaqqissaarpunga. Qattorngit qaavi tikileraangakkit imminut oqarfigisaqattaarpunga; tassa apuutilerpunga. Nukeeqqavunga aammali apuunnera assut nuannaarutigalugu, Ukaleq Slettemark oqarpoq.

Danmark sinnerlugu unammeqataasoq alla Anne De Besche normu 70-inngorpoq ooqataasarnerni sisamariarluni uniorami.

Unamminermi ajugaasuuvoq Julia Simon Frankrigimeersoq Ukaleq Slettemarkitut ataasiaannarluni uniortoq.

Kalaallit unamminerat tulleq tallimanngorpat pissaaq Sondre Slettemark naatsumut 10 kilometerimut unammissammat kiisalu Ukaleq Slettemark  naatsumut 7,5 kilometerimut arfininngorpat unammissalluni.

- Imminut tatigilluarnera attassinnaavara aamma ooqattaasarfimmi toqqissisimanera kiisalu sisorarluarnera aamma attasinnaavara. Nukittussutsikkut siuariaallaqqissinnaaguma malersuunnermut anngussinnaanissamik anguniagaq piviusorsiortuussaaq, Ukaleq Slettemark oqarpoq tassuuguinnarlu  tusagassiortunik nunanit tamalaaneersunit unngunneqarpoq.