Sondre Slettermark: Tassa OL-ertartunngorpunga
Sisoraaserluni ooqattaasartartoq Sondre Slettemark OL-imi unammeqataaqqaarnermini peqataasunit 89-iusunit normu 62-iulluni apuuppoq.
Ullumikkut unamminermi 20 kilometerimut unammisoqarpoq sisamariarluni ooqattaasarnermi 20-riarluni seqqortoqarluni. Sondre Slettemark 17-eriarluni eqquivoq pingasoriarlunili uniorneri tamarmik immikkut minutsimik ataatsimik ilanngarneqartarmata inissinneranut apparsaataapput.
- Pikkunanaartorujussuuara. Soorunami pitsaanerusinnaagaluarpoq, taamaattoq apuuppunga maannalu tassa OL-ertartunngorlunga, Sondre Slettemark KNR-imut oqarpoq.
- Misigisimavunga ajunngitsumik ingerlallunga pallungallungalu seqqorama 100 procentimik eqqarsarluarpunga. Soorunami uggornarpoq nikorfallunga seqqornerlunnerugama, Sondre Slettemark oqarpoq.
Ooqataasarnerni Sondre Slettemark aallartilluarpoq pallungalluni tallimariarluni seqqorami tamatigut eqqortarpai. Nikorfalluni ooqataasarnermi siullermi ataasiarluni uniorpoq. Pallungalluni seqqoqqikkami seqqornerni tallimani aamma tamatigut eqqortarpai. Taavali nikorfalluni ooqataasarnermi kingullermi marloriarluni uniorpoq.
OL-ertutut misigineq
Pikkorinnerit unammineranni World Cupimi siornatigut peqataasarpoq isiginnaartorpassuaqarluni tusagassiorfippassuarnit malinnaaffigineqartumi. Taamaattoq OL-imi peqataaneq immikkuullarippoq.
- Ajornakusoortorujussuuvoq. Aallaqqaaratta pissangaqaanga eqqarsarniarsaralunga; World Cupitut unamminerinnaavoq unamminerit allat assigalugit. Kisianni OL-eqataasutut misigineq takkuppoq aamma eqqarsaatigilerlugu ukiut sisamat aatsaat qaangiuppata OL-imi 20 kilometereqqissinnaallunga, taamatut misigeqqajaasorujussuuvunga, Sondre Slettemark oqarpoq.
Sondre Slettemark naatsumut unamminermi 10 kilometerimut tallimanngorpat unammissaaq.
- Aqagu qasuersaassaanga naatsuinnarmut sisorarlunga aatsaallu sisamanngorpat iluamik sungiusarlunga, Sondre Slettemark oqarpoq.
Sondre Slettemarkip aleqaa Ukaleq Slettemark aqagu pingasunngornermi unammissaaq 15 kilometerimut unammissagami tassanilu 20-riarlutik seqqussapput.
Angutit 20 kilometerimut unammineranni Norgemeersoq Johan Olav Botn ajugaasuuvoq.
