Qatanngutigiit Slettemark ukiuunerani OL-erialerput
Aallaasit nakersarlugit sisoraatillu pujassarluarlugit Østrigimi sisoraaserluni ooqattaasartarfimmi Obertilliachimi Ukaleq aamma Sondre Slettemark sungiusarput. Unammisartut taakku marluk tassani sungiusarput Italiami OL-erfiusussap Milano Cortinap silaannaa sungiunniareerniarlugu.
Sondre Slettemark siullerpaamik OL-eqataassaaq aleqaa Ukaleq Slettemark aappassaa peqataalersoq.
- Neriuuteqalaarpunga kingullermik OL-eqataaninniit timikkut nukissaqarnerussallunga. Aamma malersuunnermut anngunnissaq anguniagaavoq angisoorujussuaq. Kingullermik angungajappara. OL-imi tamanna ajornannginnerusarpoq World Cupimut sanilliullugu unammeqataasut ikinnerusarmata, Ukaleq Slettemark KNR-imut oqarpoq.
Ukaleq aamma Sondre Slettemarkip piffissami sivitsortumi ilisimavaat OL-imut toqqagaariaannaallutik. Sondre Slettemarkip toqqagaanissani siorna ukiuunerani tunngavilerluarpaa nunanit tamalaaneersut unamminerini angusarissaaqattaarami.
Malersuunnermut anngukkusuppoq
Piffissamili sivisuumi napparsimaqattaarpoq qujanartumillu maanna peqqissilivippasilluni.
- Timera piffissami kingullermi pitsaasumik qisuariartalerpoq aamma pitsanngornerusoq misigiartuinnaavillunga. Taamaattumik neriuppunga malersuunnermut anngussinnaassallumnga aamma ooqattaasarnermi pitsaasumik seqqortarsinnaassallunga. Ukioq mannami siusinnerusukkut takutereerpara nakersinnaallunga. Tamanna OL-imi iluatsissinnaassagukku iluassaqaaq, Sondre Slettemark oqarpoq.
Ukiuunerani OL tallimanngornermi februaarip arfernanni ammaanersiorneqassaaq.
