Sisoraaserluni ooqattaasarneq: Sondre Slettemark Europami pissartanngorniuttuni ujaminnattunut anngutinngeqqalaarpoq

Sisoraaserluni ooqattaasartartoq Nunatsinneersoq Sondre Slettemark angusarissaarluni sisamaattut inissippoq inuusuttuaqqat Europami pissartanngorniunnerat sapaatiummat Polenimi naammassimmat.

Unammersuarneq naggaserlugu 12 kilometerimut ataatsikkut aallartoqarpoq sisamariarlunilu ooqattaasartoqarluni. 20-riarluni seqqornermini arfinileriarluni uniorpoq bronzenannissamulli sekundit tallimaannaat amigaatigalugit. Illinertigullu ingerlaarnini immikkut Sondre Slettemarkip naammagisimaarpaa.

- Sungiusarneq aalaakkaasoq iluaqutaasinnaasoq upperaara napparsimaneq ajoqusernerillu uniffigisarnagit. Ukioq sisorarfiusoq tamanna iluatsilluarpoq sivikitsuinnarmik napparsimagama januarimilu sungiusarluarlunga. Taamaattumik ingerlalluarsinnaanissara upperilluareerpara, Sondre Slettemark KNR-mut oqarpoq.

Inuusuttuaqqani VM

Februarimi siusinnerusukkut Sondre Slettemark IBUmi inuusuttuaqqat unammmineranni Polenimi aamma sisamaattut inissilluni nunanit tamalaaaneersut unammeqataaffigai.

Maanna februarip naalernerani inuusuttuaqqat nunarsuarmi pissartanngorniunnissaat tullinnguuppoq illinertigullu sisoqqarissaarneq inuusuttut nunarsuarmi kakkannerpaat unammillernissaannut isumallualersitsivoq.

- Ooqattaasarneq tassani apeqqutaalluinnarumaarpoq. Ullugissaarluni maannatut sisorarluaruma aammalu nakerneq siornatigut takutereernikuusara angoqqissinnaagukku junior cupimi ajugaasinnaavunga, Sondre Slettemark oqarpoq.

- Piffissap sivikitsup iluani ooqattaasarneq iluarsineqarsinnaavoq sisoqqarissuseq taamatut piuminaannerulluni. Maannakkutut sisoqqarissaaginnarsinnaaguma inuusuttuaqqat VM-rnissaanni angusarissaarsinnaallunga ilimagaara, Sondre Slettemark oqarpoq.

Inuusuttuaqqat VM-rnerat februarip 21-at aallartissaaq.