Ilulissaniit aasaanerani aallakaatitsinerup danskit ilisimasaqarnerutilissagai
DR2 Ilulissanit juulip ulluisa 26-anni, 27-anni 28-annilu toqqaannartumik aallakaatitsiniarpoq, Abdel Aziz Mahmoud Maria Motzfeldtilu isiginnaarutitigut aallakaatitsinerni ilisarititsisartuussallutik.
Inuit pissanganartut nunatsinneersut Danmarkimeersullu aallakaatitsinerni pulaartuusassapput, Kalaallit Nunaata qanga, maanna siunissamilu inissisimanera pillugu oqaloqatigiittoqartassalluni.
Per Schouby, DR-imeersoq KNR-imut taama oqarpoq.
DR2-p nunatsinnit toqqaannartumik aallakaatitsinerani sinerissamit assigiinngitsunik ilanngutassiaqartassaaq, eqqumiitsuliortullu assigiinngitsut aamma peqataasassallutik.
AAMMA ATUARUK Danskere er ’privilegerede uvidende’ om Grønland
Maria Motzfeldtip nunatsinni najugaqarfimminut ilaatigut angallatissavaatigut, Danmarkimilu tv-kkut aallakaatitsinerni ilisimaneqarluartup Frank Eriksenip, Bonderøvenitut immaqa ilisimaneqarnerusup, nunatsinni nunaatillit tikeraassavai, nunatsinni nunaatillit ulluinnarni atugarisaat, unammilligassaat periarfissaallu eqqartortassallugit.
Nunatsinnit toqqaannartumik aallakaatitsisarnerit Kitaanit, Kujataanit Tunumiillu ilanngutassiaqartassapput. DR taama ilisimatitsivoq.
AAMMA ATUARUK Danskit nunasiaateqarnerup nalaa pillugu ilisimasakippallaarput
Qallunaat Nunarput inuisalu pillugit ilisimasaqarnerulernissaat DR2-p aallakaatitsinerani siunertaavoq. Naalagaaffeqatigiinneq pillugu oqallinnermi apeqqutit suut qitiunersut sammineqartassallutik, Kalaallit Nunaat Danmarkilu suut ataatsimoorussaraat, Kalaallit Nunaallu siunissaq ungasinnerusoq eqqarsaatigalugu Danmarkimit aningaasatigut qanoq ililluni isumalluuteqarunnaarsinnaassava?
