NASA-mit toqqaannartoq Qaammatip USA taarsisileraa
![](/sites/default/files/styles/image_934x467/public/article_images/manen_630_0.jpg?itok=VzsXMe_v)
Seqernup kangianiit Oregonimiit kitaanut South Carolinap tungaanut pulanissaa takuneqarsinnaassaaq. Seqernup pulanera nunatta nalunaaqutaa malillugu marlunut aallartippoq.
Inuit hundrede millionippassuit - amerikamiut takornariallu Qaammatip Seqernup saaniinnissaa nunarsuullu taartuinnanngutallannissaa isiginnaariakaassagaat naatsorsuutigineqarpoq.
Amerikami naalagaaffinni arlalinni akunnittarfiit timmisartullu ulikkaarsimapput, tassami ulloriarsiornermik nuannarisaqarluartut nunarsuatsinni assigiinngitsuneersut takunnikkumallutik tikerarsimapput.
Nunatsinnilu tamanna aamma takuneqarsinnaassaaq isinnilli takusinnaanngikkaluarlugu nittartakkakkut tamanna takuneqarsinnaavoq.
Amerikamiummi avataarsuanik misissuisarfiat Nasa seqernup pulaneranit nittartakkamigut toqqaannartumik aallakaatitsissaaq.
Seqernup pulanera nittartakkakkut isiginnaarnissaa iluaqutissartaqarpoq tassa illersuutinik isarusseqqaarnissaq pisariaqanngilaq.
Danmarkimi seqernup pulanissaa tulliani ukiut 125-t qaangiuppata pissaaq. Tamanna Bornholmimi maajip 25-at 2142-mi pissaaq. Ullorlu tassani piffissaqanngikkaanni tullissaani tamanna septembari 2426-mi takuneqarsinnaassaaq.