WHO: Sodavandinut sukkoqanngitsunut tungusunnissaat kræfteqalissutaaratarsinnaavoq

Sukkunut taarsiullugu tungusunnissaat aspartamimik taaguuteqartinneqartoq, ilaatigut imeruersaatini sodavandini akutigitinneqartoq kræfteqalissutaaratarsinnaavoq.

Suliniaqatigiiffiit marluk Naalagaaffiit Peqatigiit peqqissuunissaq pillugu suleqatigiiffiannut WHO-mut attuumassuteqartut, taama nalunaarput.

Tungusunnissaatip atorneqarnissaanut innersuussutigineqartut malinneqarpata naviananngitsoq nalunaarutigineqarpoq.

Aspartamip qanoq annertutigisumik atoraanni navianarsinnaanera immikkut ilisimasaqaqatigiit marluk misissuineranni nutaamik paasisaqarfigineqanngilaq.

Aspartamip ullormut kilomut 40 milligramimit annikinnerusunik atorneqarnissaa suli innersuussutigineqarpoq.

60-it 70-illu akornanni oqimaassuseqaraanni ullormut qulingiluaniit 14-nut sodavanditoraanni killissaritinneqartoq qaangerneqassaaq.

Ilisimatoorpaaluit misissuisitsinermi peqataanngillat, aspartamillu kræfteqalissutaaratarsinnaaneranut paasineqartut ilisimatuunit nalorninartoqartinneqarpoq.

Aspartamip atorneqarneratigut oqinnerulerniarnermut iluaqutaaneranik uppernarsaatissaqanngitsoq, Naalagaaffiit Peqatigiit peqqissuunissaq pillugu suleqatigiiffiata WHO-p siusinnerusukkut oqaatigaa.

Aspartamilli tunisassiortunit tamanna ilumuunnginnerarneqarpoq.