Socialdemokratit talerperliunianut illuatungiliipput
Kalaallit Nunaanni aningaasarsiornerup inissisimanera ernumanartoqarneranik taallugu Danmarkimi partiit talerperliuniat, Dansk Folkepartip Kalaallit Nunaannut tunngasunut oqaaseqartartua Søren Espersen siuttoralugu, Folketingimi oqaluuserisassanngortereeraallu Socialdemokratit taama eqqaasitsissuteqarput.
Kalaallit Nunaat ukiuni tulliuttuni amerlasuuni koruuninik millionilikkaanik ukiumut amigarooruteqarluni ingerlasarnissaa, Søren Espersenip tikkuartorpaa, assersuutigalugulu ataatsimoortumik tapiissutit qaffanneqartariaqarnissaat pisariaqassasoq. Taamatulli pisoqassappat Namminersorneq pillugu isumaqatigiissut 2009-meersoq allanngortinneqartariaqassaaq.
AAMMA ATUARUK Dansk Folkepartiip Nunatsinnut "ikiorsiiniarnera" Olsvigip iluarinngilaa
Espersenilli oqaasii Socialdemokratit Kalaallit Nunaannut tunngasunut oqaaseqartartuanit Flemming Møller Mortensenimit illuatungilerneqarput:
- Kalaallit Nunaata namminersulernikuunera ataqqigaluaraanni ataqqinngikkaluaraanniluunniit oqaatsit sakkortupput, Flemming Møller Mortensen oqarpoq.
Kalaallit Nunaanni pissutsit pillugit, Naalagaaffeqatigiinnerlumi pillugu, Folketingimi ukiumoortumik apeqquteqaateqartoqartarnera, taassuma eqqaasitsissutigaa, Kalaallit Nunaatalu aningaasarsiornera apriilimi apeqquteqaateqartoqarnerata kingorna ajornerulersimanngitsoq aamma oqaatigalugu.
AAMMA ATUARUK Nunatta maanna inissisimanera Dansk Folkepartiip ernumanartoqartikkaa
Naalakkersuisut siulittaasuat Folketingimi partiit talerperliit oqariartuutaannut suli oqaaseqarsinnaasimanngilaq.
Kalaallit Nunaannili politikerit Kalaallit Nunaata aningaasarsiorneranik namminneq akisussaasuusut, Inuit Ataqatigiit Folketingimi ilaasortaatitaata Sara Olsvigip erseqqissaatigaa. Dansk Folkepartiip tamanna ilaatigut puigortarunaraa, taassuma aamma oqaatigaa.
