Dansk Folkepartiip Nunatsinnut "ikiorsiiniarnera" Olsvigip iluarinngilaa
Kalaallit Nunaanni innuttaasut ajornartorsiutaat Kalaallit Nunaatalu aningaasaqarnerata aqqinneqarnissaa, qanoq iliornikkut ilorraap tungaanut saatinneqarsinnaanersut, maanna naalakkersuisuusut, Aleqa Hammond siuttoralugu nalornisigaat.
Dansk Folke Partiip Kalaallit Nunaat pillugu folketingimi oqaaseqartartua, Søren Espersen taama oqarpoq siunersuutigalugulu tamanna folketingimi oqallisigineqartariaqartoq.
- Kalaallit Nunaat maanna namminersortuuvoq, taamaattumillu Kalaallit Nunaanni ajornartorsiutit kalaallit namminneerlutik aqqitassarigaluarpaat. Naalakkersuisunilli ajornartorsiutit soqutigineqarpasinngillat. Naalakkersuisut allarpassuarnik sammisaqarput, kalaallit inuuniarnikkut ajornartorsiutaat aamma Kalaallit Nunaata tunisassiornera puigorlugit. Taamaattumiguna tamanna pillugu ministeriunermut, Helle Thorning-Schmidtimut apeqquteqaateqartugut, Kalaallit Nunaanni pissutsit erloqinartut ilorraap tungaanut qanoq saatinneqarnissaannik ujartuilluta.
Søren Espersen aamma oqarpoq, Kalaallit Nunaanni ajornartorsiutit annertuut qanoq aaqqinneqarsinnaanissaat pillugit, maanna naalakkersuisuusut Aleqa Hammond siuttoralugu siunnesuuteqarsimanngitsut.
- Kalaallit Nunaata ajornartorsiutaat annertuut qanoq iliornikkut aaqqinneqarnissaat, Aleqa Hammondip naalakkersuisoqataasalu aqqissinnaanngikkaat malunnarluarpoq, Søren Espersen oqarpoq.
Taassumali taama isumaqarnera, Inuit Ataqatigiit siulittaasuata aamma Folketingimi ilaasortap, Sara Olsvigip isumaqatiginngilaa.
- Uanga isumaqarpunga Naalakkersuisut paasisimagaat, Nunatta aningaasaqarnera qanoq inissisimanersoq. Maannalu pingaaruteqarnerpaaq tassaavoq, Aningasanut Inatsit pillugu isumaqatigiinniarnerit qanoq ingerlanneqassanersut aamma pingaarutteqarluni Nunatta aningaasatigut qanoq ingerlanniarneqarnissaa pillugu, partiit assigiinngitsut ataatsimoorussaminnik naaperiarnissaat.
Sara Olsvigip aamma oqaatigaa, Nunatta aningaasaqarniarnerata ilorraap tungaanut aallarteqqinneqarnissaa pillugu folketingi akuleruttussaanngimmat, tamanna Inatsisartut Naalakkersuisullu akornanni aaqqinneqartussaasoq oqaatigalugu.
Taamaakkaluartorli Søren Espersenip avaqqunneqarsinnaanngitsutut oqaatigaa, kalaallit akornanni inuuniarnikkut ajornartorsiutit ima annertutigilersimammata, allaat folketingi tamassumunnga ilannguttariaqalersoq.
- Kaalaallit inuttut atugaat, ingammik meeqqat ilaqutariillu akissaatikitsut atugaasa aningaasalersornerat ajorluinnartoq ilisimavarput. Tamatumunngalu ilutigitillugu utoqqaat atugaasa pitsanngorsarnissaannut aningaasaliissutit aamma ikileriffigineqartut ilisimallutigu. Tamakku pissutsit Naalagaaffeqatigiinnerup iluani akuerineqarsinnaanngillaat, taamaattumik oqallisaasariaqarput.
Kalaallit Nunaat pillugu Dansk Folke Partiip oqaaseqartartua, Søren Espersen oqarpoq.
Naalakkersuisut siulittaasuat, Aleqa Hammond oqaseqartinniaraluaratsigu, New Yorkimiittoq attaveqarfigisinnaanngilarput.
Naqqiut: Allaaserisatsinni allappugut Aleqa Hammond maannakkorpiaq New Yorkimut angalasoq. Tamannali eqqunngilaq, aatsaat septembarip 20-ani New Yorkiliartussaavoq, Naalagaaffiit Peqatigiit Nunap Inoqqaavi pillugit Nunarsuarmioqatigiinnik ataatsimeersuartitsineranut peqataassalluni.
