Socialdemokratit: Siumut, ernumanasi
Siumup folketingimut qinigassanngortitai ataatsimoorlutik Socialdemokratit siulittaasuannut ernummanerminnik allagaqaateqaqqammerput. Ernumassutissanngitsorli, Henrik Sass Larsenip oqaatigaa: - Kalaallit Nunaannik suleqateqarnitsinni ataqqeqatiginnittorujussuuvugut, aamma Siumumik. Kalaallit Nunaata uuliamik qalluilersinnaaneranut eqqarsaatigalugu, Namminersorneq pillugu isumaqatigiissut qimarratiginavianngilarput, Socialdemokratit politikkikkut oqaaseqartartuat Henrik Sass Larsen oqarpoq. Kalaallit Nunaata nammineq aalajangiisinnaassuseqarnera Socialdemokratinit tapersersorneqarunnaarsimanersoq ernummatigalugu Siumup folketingimut qinigassanngortitai Socialdemokratit siulittaasuannut Helle Thorning-Schmidtimut allagaqaqqammerput. Henrik Sass Larsenillu Siumup Folketingimut qinigassanngortitai nersualaarpai, Danmarkimi politikikkut oqallinnermi Kalaallit Nunaata soqutigisai sanioqqutaarneqartutut tusarniutaa qisuariarmata : - Taamaammat Siumut maannangaaq oqaloqatigerusupparput oqaluttuullugillu, isummavut ernumassutigisariaqanngikkaat, Henrik Sass Larsen oqarpoq. Isuma, Kalaallit Nunaata uuliasiorani EU-mit aningaasanik taartisiaqarnissaanut tunngasoq, Socialdemokratit EU-parlamentimut ilaasortaatitaata Dan Jørgensenip tapersersormagu, Siumup folketingimut qinigassanngortitaasa ernumanartillugu allagaqaqqammerput. Socialdemokratilli tamanna politikkerinngikkaat, Henrik Sass Larsen oqarpoq: - Kalaallit Nunaata uulisiorniarluni qillerisinnaanera pissusissamisuuginnartutut isigaarput tapersersorlugulu. Mexicop kangerliumanersuani uuliamik maqisoortoqarnera eqqarsaatigalugu, uuliasiornermi isumannaallisaaneq pillugu ernummateqarnerput taamaallaat oqaatiginikuuarput. Isumannaallisaanerulli pingaaruteqassusaa tamatta isumaqatigiissutigaarput, Kalaallit Nunaannimi ajutoortoqannginnissaa tamatta pingaartipparput, Henrik Sass Larsen oqarpoq. Puisit amiisa EU-mut eqquteqqusaajunnarnerat Socialdemokratinit akerlilerneqartoq, taassuma aamma erseqqissaatigaa. Taamaakkaluartorli Dan Jørgensenip amernik eqqusseqqusiunnaarneq tapersersormagu, tamanna peqquteqarnerarpaa, Europaparlamentimi ilaasortat qanoq taasisassanersut, danskit socialdemokratertaasa aqussinnaangimmagu.
