Socialdemokraatit suli utoqqatserusupput

Socialdemokraatit qinersinerup kingorna naalakkersuisunngortitsissagunik meeqqat 22-it 1951-mi pinngitsaaliissummik atugartuunngortinniarlugit Danmarkiliartinneqarnerat pillugu Danmarkip pisortatigoortumik utoqqatsernissaa naatsorsuutigineqarsinnaavoq.

Taamatut aalajangiusimanngippoq Socialdemokraatit Kalaallit Nunaat pillugu oqaaseqartartuat Mogens Jensen, taanaavorlu Danmarkip utoqqatsernissaanik arlaleriarluni noqqaassuteqartarsimagaluartoq.

- Oqaaserisimasakka aalajangiusimavakka. Isumaqarpunga Danmarkip kalaallit meerartaannut innimiilliorsimanera ima ilungersunartigisoq pisortatigoortumik Danmarkip utoqqatsernissaa pisariaqarluni. Talerperliit naalakkersuisuuneranni isumaga taamaappoq aamma isumaga taamaassaaq Socialdemokraatit siuttuuffigisaannik naalakkersuisunngortitsisoqassappat, oqarpoq.

Kisiannili Socialdemokraatit iluanni tamanna assigiinngitsunik isummersorfigineqarpoq. Nordisk Rådip siulittaasua Henrik Dam Kristensen akerlerluinnaanik isumaqarpoq.

- Isumaqarpunga ajornakusoortoq ullutsinni politikkerit utoqqatsernissaat kinguaariit arlallit matuma siorna politikkerit iliuuserisimasaat pillugu. Taamaammat naluara tamanna sumut iluaqutaajumaarnersoq, Henrik Dam Kristensen oqarpoq.

Taamaakkaluartoq tassa Mogens Jensen isumaqarpoq utoqqatsernissaq Socialdemokraatit politikkiannut naapertuuttoq.

- Uanga Kalaallit Nunaat pillugu oqaaseqartartuugama uani apeqqummi isummertuuvunga tamannalu pillugu partiimi aquttut ilisimatissimavakka. Nalunngikkaluarpara pereersut pillugit utoqqatseqattaartoqarsinnaanngitsoq. Unali pisoq ima ilungersunartigaaq utoqqatsernissaq akuersaarneqartariaqarluni, Mogens Jensen oqarpoq.

Mogens Jensen aamma neriorsuivoq Socialdemokraatit naalakkersuisunngortitsissappata kalaallisut oqaasilimmik Danmarkimi kalaallit palaseqarnissaat aaqqinniarneqarumaartoq. Aamma iliuuseqarnissamut aningaasaliissutit ilaatigut Kalaallit Illuutaannut atorneqartartut misissoqqinnissaat ammaffiginerarpaa.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat