Slettemark nutaaq illinerni ingerlallualereerpoq

Sondre Slettemark inuusuttuaqqat VM-qarneranni unamminerni pingasuni peqataavoq unammisaqattaarninilu pingasunngorneq martsip pingajuat naammassivai.

Sondre Slettemark Ukaleq Slettemarkip inuusuttuni VM-qataaqqammersup aqqaluaraa taannalu siullerpaamik inuusuttuaqqani VM-qataavoq.

Unamminerit taakku pingasut aallarnerlugit peqataasunit 111-nit normu 25-nngoreerluni tulliani normu 24-nngorpoq. Pingasunngornermilu malersuunnermi normu 23-nngorpoq.

- Assut naammagisimaarpara. Aallartikkama VM-qataasut qanoq kakkatsiginersut naluara. Taamaattumik unamminermi siullermi pissangavunga, Sondre Slettemark naliliivoq U-19-ni unammeqataareerluni taamaasillunilu imminerminiit angajullernut unammilluni.

AAMMA ATUARUK Ilikkagaqarfiusumik Ukaleq Slettemark VM-mi peqataarngaarpoq

Unammineq siulleq naammassimmat qamuuna eqqissineruvoq eqqaaneqareersutullu normu 24-nngorrpoq 7,5 kilometerimut naatsumut unamminermi naggataanilu malersuunnermi 10 kilometerimut normu 23-nngorluni.

- Unamminerit tulliuttut neriuutigisattut ingerlapput taakkunani ooqattaasarluarama aammalu sukkassusera naammagisimaarnarluni, Sondre Slettemark oqarpoq.

Eqqarsartaatsikkut tamaviaarnartoq

Nunarsuarmi coronartoqarnera pissutaalluni inuusuttuaqqat unamminissarpassui taamaatiinnarneqarput. Taamaattumik inuusuttuaqqani VM-qataaneq Sondre Slettemarkimut uani ukiumi unamminerit annertuut kingullersarigallarsinnaavaat.

VM-mi peqataanermi suut pitsanngoriartissanerlugit Sondre Slettemarkimut takujuminarnerulerpoq. Pitsanngorsagassat ilagaat unamminermi ooqattaasarnerit kingullersaat.

AAMMA ATUARUK Ukaleq Slettemark siullerpaamik inersimasuni Sloveniami VM-qataalerpoq

- Siullermeerluni ooqattaasarnerup allaassutigaa kingullermut sanilliullugu ilungersunartutut misinnannginnerugami. Aallaqqaarnermi ooqattaasarluareersimagaanni ingerlalluartutut eqqarsalertoortoqarsinnaavoq. Taamaattumik ooqattaasarnermi kingullermi eqqarsarluarnissaq pingaaruteqartorujussuuvoq, taanna sioqqullugu ooqattaasarluarsimagaluaraanniluunniit, Sondre Slettemark oqarpoq.

Suli ukiut arlallit U-19-ni unammisartuusussaavoq taamaattumik ukiut tulliuttut ukioqatimini qaffakkiartorsinnaalluni.