Qimussit illerngi qimmit anaqaqqusaajunnaassapput
Taamaattarnerali qaangiutissaaq. Tassami illinernik atuinermi avangiisinik paaqqinninnissamut piumasaqaatinik sukannersunik, Inatsisartut nutaamik inatsisiliorput. Ilaatigullu tassa illinerni qimmit anartassanngillat.
Qimussertartut tamaammat puussianik plastikkinik, qimmit anaannut poortuutissanik, maannamiit nassataqartartussanngorput.
- Qimmeq quiniarpasileraangat anarniarpasileraangalluunniit, qimussit erniinnaartumik unitsinneqartassapput, qimussertullu puussiaq qimmip ataaanut inissipallassavaa. Inatsimmut oqaasertaliussani naliginnaasuni taama allassimavoq.
Kommunit inatsit malillugu puussianik tunniussisarnissamut pisussaaffeqanngillat. Karsinilli, puussianik anartalinnik katersuvissanik, inissittuissaapput.
Karsit annanik katersuiviit qimussit tikittarfiannut inississorneqassapput.
Kisianni illoqarfiit nunaqarfiillu iluini qimmit anaat qanoq pineqassanersut inatsimmi ilanngunneqanngilaq.
- Illoqarfiit nunaqarfiillu saligaatsuutinnissaat kommunalbestyrelsit akisussaffigaat, inatsimmut atuutileqqammersumut oqaasertaliusssani allassimavoq.
Inatsimmi Avannaata Qimussersuani assigisaannilu unamminerit pineqanngillat, aaqqissuisulli unammisitsereernermi annanik katersisassapput.