Sisoraaserluni ooqattaasarneq: Sondre Slettemark siumukarluarluni USA-mi VM-rtuni inissilluarpoq

17-nik ukiullip Sondre Slettemarkip siorna inuusuttuni nunarsuarmi pissartanngorniuteqqaarnermini angusani inissinnernik tallimanik pitsanngoriartippaa.

Naatsumut 7,5 kilometerimut tallimanngormat unamminermi normu 20-tut inissippoq taannalu nunani tamalaani unammeqataasarnermini angusaasa pitsaanersaraat.

- Siornamut sanilliullugu pitsaanerulaartumik angusaqarnissaq anguniarpara angullugulu. Ooqattaasarluarneruvunga aammalu illinertigut ingerlaarluarnerullunga, Sondre Slettemark VM-rfiusumit USA-mi Soldier Hollowimiit KNR-mut taama oqarpoq.

Pingasunngormat unammeqqaarami oqimaarsarneruvoq 12,5 kilometerimut sisamanik ooqattaasarnertalimmut peqataagami. Tassani normu 33-nngorpoq peqataasut 61-usut pingasoriarlunilu uniorluni.

AAMMA ATUARUK Qatanngutigiit Slettemarkikkut amerikamiut aputaanni medaljennattunut ilaaniassamaarput

Tallimanngormat naatsumut unammineq pitsanngoriarfiuvoq tassanimi Sondre Slettemark peqataasunit 63-nit normu 20-nngorpoq, VM-qataaninilu naggaserlugu sapaammi 10 kilometerimut malersuunnermi peqataasunit 60-usunit normu 26-nngorpoq.

Sondre Slettemark ooqattaasartarnermini ingerlalluarpoq ikittuinnarnik uniorluni, uniornerilli tamarmik sekunditigut inissinnertigullu appariaallaataasarput.

- Pitsaanerusoqarsinnaavoq inuunermilu suut tamangajammik taamaapput, Sondre Slettemark ooqattaasarnini pillugu oqarpoq.

- Toraajuneq eqqarsaatigalugu 90 aamma 85 procentimiippunga. Tamanna ooqattaasarluarneruvoq naammagisimaarparalu, Sondre Slettemark oqarpoq.

Ukaleq appariarpoq

Ukaleq Slettemarkip piginnaasani tamakkerlugit inuusuttut VM-rneranni takutinngilai. 12,5 kilometerimut unamminermi normu 19-nngorpoq naatsumullu unamminermi normu 51-nngorluni.

Inuttaa aamma nalunaarpoq piffissaq kingulleq sakkortuumik unammisaqattaarneq ungasissumullu angalasaqattaarneq timikkut eqqarsartaatsikkullu qasulernermik kinguneqartut.

Taamaattumik Ukaleq Slettemark 10 kilometerimut malersuunnermut peqataanngiinnarpoq maannalu timini qasuersaartikkallarpaa martsip 17-at Norgemi Holmenkollenimi World Cupimut unamminnginnermini. Taanna aamma ukiormanna unamminerisa annertuut kingullersaraat.

Sondre Slettemark inuusuttut OL-qarnissaannut Finlandimi martsip 20-aniit pisussamut toqqagaavoq tassanilu tamaviaassalluni piareersimavoq.

- Suut naatsorsuutiginerlugit oqaatigiuminaappoq. Pikkorinnerit qulit akornanniinnissaq neriuutigineqarsinnaavoq. Ajornakusuussaqaarli tassanilu apeqqutaalluinnarumaarpoq piginnaasakka tamakkivillugit takutitsisinnaassanersunga ooqattaasarnermi illertigullu sisorarnermi, Sondre Slettemark naggasiivoq.