Qatanngutigiit Slettemarkikkut amerikamiut aputaanni medaljennattunut ilaaniassamaarput
Ukaleq Slettemarkip 20-nik ukiullip qaammatip matuma aallartisisimanerani Kinami OL-imut peqataareerluni kamippani sisoraarutit qasuersaartingaanngilai.
Tassami sapaatip akunnerani maani unammisaqattaarnerit allat aallartipput.
Massakkut tassaavoq inuusuttunut VM, sisorartarfimmi USA-mi Soldier Hollow-imi ingerlanneqassaaq.
Aqqalussani 17-inik ukiulik Sondre ilagaa, aamma unammisaqattaarnerni ilaasussaq.
AAMMA ATUARUK Ukaleq uniunngereerluni: Unammereernitsinni nunarsuarmi kakkannerpaat pilluaqqusiartorput
Tamarmik kalaallit erfalasuata ataani ilaassapput, takisuumullu 12,5 kilometerinut sisamariarlutik igeriaqattaarfiusumi arpannermut aallaqqaasiissallutik.
Ukaleq aamma Sondre KNR2-mi malinnaaffigikkit
Pingasunngorneq nal. 15: Sondre 12,5 km-issaaq
Sisamanngorneq nal. 18: Ukaleq 12,5 km-issaaq
Tallimanngorneq nal. 15: Sondre 7,5 km-issaaq
Arfininngorneq nal. 18: Ukaleq 7,5 km-issaaq
Sapaat nal. 16: Sondre malersuulluni 10 km-issaaq
Sapaat nal. 19.20: Ukaleq malersuulluni 10 km-issaaq
Unammineq taanna pingasunngorpat Sondrep misilissavaa, Ukalillu aqagu sisimanngornermi misilissallugu.
Ungasissuseq taannarpiaq 2019-imi inuusuttunut nunarsuarmi pissartanngorfigaa.
Tassani igeriarnerni 20-ni tamakkerpai.
Pitsaanerpaaniit igeriarluarneruvoq
Ukaleq Slettemarkip aamma Beijingimi ukiuunerani unammisaqattaarnerni qaangiuteqqammersuni igeriarnermini tamakkerlugit eqqorpai – arnanit peqataasunit kisiartaalluni.
Naallu periarfissani 30-ni 30-raaraluarluni medaljinnanngikkaluarluni inuusuttoq Kalaallit Nunaannut neriunarluartoq iluarisimaarinnippoq.
AAMMA ATUARUK Kalaallit Nunaanni sisoraaserluni ooqattaasarfissaq siulleq piareersarneqarpoq
- Sisoraaserlutik ooqattaasartartut nunarsuami pikkkorinnerpaat ornillunga pilluaqqusiartorput. Soorunami taamaaliormata misigisaq angisoorsuuvoq. Ilaatigut tassaapput Denise Herrmann aamma Tiril Eckhoff. Inuit ajasoorput angusarlu ajunngivippoq, unammineq kingulleq naammassimmat KNR-imut oqarpoq.
Sondre aamma igeriallaqqivippoq.
Januaarimi Norges Cup-imi 10-kilometer-imut unamminermi ajugaavoq, tassanilu igeriaqattaarnermi 20-t tamakkerlugit eqqorpai.
KNR-TV-mi inuusuttut VM-eqarneranni Ukaleq Sondrelu Slettemark malinnaaffigisinnaavatit.
Siulliussaaq ualeru nal 15, tassaniliu KNR2-mi Sondre Slettemark ungasissumut unammissaaq.
