Kalaallit Nunaanni sisoraaserluni ooqattaasarfissaq siulleq piareersarneqarpoq

Kalaaleq sisoraaserluni ooqattaasartartoq Ukaleq Slettemark Kinami Beijingimi OL-ertunut siullermeerluni peqataanermini ooqattariagassat 20-t tamaasa eqqoramigit Nuummi inuusuttunit nuannaartorineqalerpoq.

Taama oqaluttuarpoq, ujakkaartartoq Martin Møller. Taanna ukiuunerani OL-ertoqarnerani marloriarluni unammeqataanikuuvoq.

Martin Møller Kalaallit Nunaanni sisoraaserluni ooqattaasartartut kattuffiat suleqatigalugu Nuummi sisoraaserluni ooqattaasarfissamik pilersitsiniarlutik aasarli aallartipput, taamaalillunilu Kalaallit Nunaanni sisoraaserluni ooqattaasarfik siullerpaaq qaammat ataaseq qaangiuppat atoqqaarfissiorneqarsinnaassaaq.

20-nik ukiulik Ukaleq Slettemark ataasinngornermi OL-imi ooqattaasariagassat 20-t tamaasa eqqormagit, Martin Møllerip kakkagivaa.

AAMMA ATUARUK Sisoraaserluni ooqattaasarneq: Ukaleq 22-mi OL-mut alloriarpoq

Martin Møller Kalaallit Nunaani sisoraaserluni ooqattaasartartut kattuffiallu naliliipput, Ukaleq Slettemarkip nunarsuarmi unammeqataasarnermini angusai pitsanngoriartortillugit inuusuttut sisoraaserluni ooqattaasarnermik soqutiginnikkaluttuinnartut.

Taamaattumik Nuummi sisoraaserluni ooqattaasarfeqartariaqartoq, Martin Møller oqarpoq.

- Sisoraaserluni ooqattaasartunik pikkorissunik Ukaleq Slettemarkitut ittunik peqarpugut, kisianni Kalaallit Nunaanni sisoraaserluni ooqattaasarfeqanngimmat timersuut taanna aallunneqarnikuunngilaq, taamaattumik Kalaallit Nunaanni sisoraaserluni ooqattaasarfimmik aallussisoqalernissaa periarfissaanissaalu pillugit suliniummik misiliivugut, Martin Møller oqarpoq.

Politiit akuersinissaat utaqqigaat

Sisoraaserluni ooqattaasarfissaq Nuummi sisorartartut peqatigiiffiata NSP-ip sungiusartarfiata eqqaani Nuussuup mannguaniissaaq.

Ooqattaasariarfissat arfiniliussapput, ooqattaasarutissallu pissarsiarineqareeersut Martin Møller oqaluttuarpoq.

Sisoraaserluni ooqattaasartartussat, OL-imi sisoraaserluni ooqattaasartut pisinnaasaattut atugassaqartitaassanngillat.

Igeriarfigineqartussarmi meterinik qulinik ungasitsigissaaq 50-meterisut ungasitsiginani, soorlu Ukaleq Slettemark OL-imi unammeqataasalu eqqoriagassaattut uangasitsiginani.

Ooqattaasariartarfissat assersorneqassapput ooqattassarfissap eqqaanniittut eqqorneqassanngimmata, Martin Møller taama qulakkeerinnippoq.

Maanna oqaattaasarfissap pilersinneqarnissaanut politiit akuersinissaat suliniuteqartut utaqqivaat.

Ujakkaartartut sisoraaserluni ooqattaasartunngornissaminnut soqutiginnittuunissaat Martin Møllerip nalilerpaa.

- Sisoraaserluni ooqattaasarneq ujakkaarnermik ooqattaasarnermillu ataatsimoortitsinertut isigaara, taamaammat ujakkaartooreerput. Kisianni tassa sisoraaserlutik oqilaniussinnaasariaqarput, Arctic Circle Racemi unammeqataasinnaasuussallutik allapparsuarnillu. Ooqattaasartarnerli uagut timersuutitsinnut sisoraateqarlunilu timersornernut tamanut immaqa soqutiginninnerulersitsisinnaavoq, Martin Møller oqarpoq.

- Ingammik inuusuttut sisoraaserluni ooqattaasarneq nuannarinerulaaraat malugisinnaavara, Martin Møller oqarpoq.

Sisoraaserluni ooqattaasartartussaq Martin Møllerimit aallaqqaammut sungiusarneqartassapput. Taassumalu neriuutigaa, nunat tamat sisoraaserluni ooqattaasartartut katuffiat sungiusaasartussanik pikkorissartitsisarumaartoq sungiusaasartuniluunniit pissarsinissamut ikiuuttarumartoq, Martin Møller KNR-imut oqarpoq