Siusissukkut iliuuseqarneq inatsisiliuteqquaat
Politikerit pingasut taakkua inatsisartuni ilaqutariinnermut ataatsimiititaliaq sinnerlugu ilaqutariinnni siusissumik iliuuseqartarnerup isumaa pillugu nunani avannarlerni isumasioqatigiinnermi Stockholm-imi sapaatip akunnerani kingullermi ingerlanneqartumi peqataapput.
Isumasioqatigiinneq nunanit avannarlerneersunit inunnit 300-nit peqattaaffgineqartoq ilaqutariinnut siusissumik iliuuseqartarnermi suliniutit inernerat nalilersorneqarlutik.
Pingaarnertut oqariartuutigineqartoq tassaavoq, siusissumik iliuuseqarnermi tamatigut imminut akilersinnaasartoq. Ilaqutariit sanngiitsut pillugit suliniarnerni utaqqinermi piffissaq sivitsoriartortillugu meeqqat aammalumi ilaqutariit sumiginnakkat ajoquserneqartarnerat sakkortusiartortarpoq.
Kalaallit Nunaanni isumaginninneq pillugu politikkimik suliaqarnermi ukiut amerlasuut politikikkut tamanna anguniagaavoq. Taamaakkaluartoq Olga P. Berhelsen Ruth Heilmann aamma Astrid Fleischer Rex isumaqarput Naalakkersuinermi eqqarsaatigineqasssoq, siusissumik iliuuseqartarnerup politikikkut anguniakkatut pisussaaffiliinngitsutut siunertamiit inatsisitigut qanoq nalimmassarneqarsinnaanera anguniarneqassaasoq.
Inatsisartut 2013-mi upernaakkut ataatsimiinissaanni eqqarsaatigineqarpoq meeqqat inuusuttullu pillugit inatsisip nukittorsarneqarnissaa siunertaralugu allannguutissamik siunnersuuteqarnissaq.
Siunnersuummi nalimmassarneqarsinnaassaaaq kommunit pisussaaffimmittut suliassarissagaat ilaqutariinni meerartalinni pisariaqartitsineq tunngavigalugu siusissumik iliuuseqartarnissaq suliniuteqartarnissarlu.
Inatsisartuni ilaqutariinnermi ataatsimiititaliami ilaasortat nunat avannarlerni ilaqutariinnut siusissummik iliuuseqarnermi isumasioqatigiinnerup kingorna tusagassiuutinut nalunaaruteqarlutik taamatut allaput.