IA: Siunnersuut apeqquserpaat

Aalisarsinnaanermut akuersissutinik tunniussisarnerup aqunneqarnerata kommuninit isumagineqarnerulernissaa Inatsisartunut pingasunngormat saqqummiunneqarpoq.

IT-mut systemeq nutaaq atorlugu qinnuteqaatit sukkanerusumik suliarineqartalernissaat matumani siunertaavoq.

IT-mut atortorissaarut 1,3 millionit koruuninik akeqassasoq, Naalakkersuisut naatsorsuutigaat.

Innuttaasullu systemi ikiortigalugu nittartakkatigut Sullissivik.gl-imut Businessingreenland.gl-imut sullissivinnulluunniit ornigullutik aalisarsinnaanermut qinnuteqarsinnaassapput.

Aamma atuaruk Aalisarsinnaanermut akuersissutit sivitsorneqarput

- Qinnuteqaat ingerlaannaq suliarineqassaaq, piumasaqaatigineqartullu naammassineqarsimappata akuersissut innuttaasumut ingerlaannaq tunniunneqarsinnaalissalluni, Naalakkersuisut saqqummiussissutiminni taama allapput.  

Siunnersuut Partii Naleqqaminngaanniit, Demokraatininngaanniit Siumumiillu taperserneqarpoq.

- Misilittakkagut aallaavigalugit, akuersissummik pissarsinarneq aammalu pissarsiaqartarneq, piffissaq ilaatigut sivisoorujussuarmik uteqattaartumillu kinguneqartumik ingerlaqattaarsinnaasapput, kisianni tassa kommunep pisussaaffimmik tigumminnilerpata isumaqarpunga arlorianneq tassani pittaassasoq aammalu sukkanerusumik inuit qanoq kiffartuuneqarneranik naammaginartumik naammassineqalertassasoq, Aalisarnermut, Piniarnermut nunalerinermullu ataatsimiititaliami siulittaasoq, Karl Kristian Kruse, taama oqarpoq.

Aamma atuaruk NUUMMIIT NUUNNEQ Kielsen: Suliassaqarfinnik komuninut nussuinissamut suliaq aallartinneqareerpoq

Akisussaafik kommunimut nuunniarneqarnera Inuit ataqatigiinnit aamma isumaqataaffigineqarpoq, taamaattorli;.

- Ilaannakortumik nuussuinerit taakkua apeqquserujussuarnikuuvagut massakkut takusagut pillugit, tassa ilaannakortumik nuussisoqaraangat sulisunik amerlanerusunik sulisuqalernermik kinguneqartarmata taavalu aamma oqartussaaffiit nuunneqanngittut pillugit ilaatigut utaqqisitsinnerat pissutaallutik, Aalisarnermut, Piniarnermut nunalerinermullu ataatsimiititaliami ilaasortaq, Inuit Ataqatigiinneersorlu, Ane Hansen, taama oqarpoq.

Siunnersuutip Aalisarnermut, Piniarnermut Nunalerinermullu ataatsimiititaliamut suliareqqitassanngorlugu ingerlateqqinneqarpoq.