Aalisarsinnaanermut akuersissutit sivitsorneqarput
Aalisarsinnaanermut akuersissutit Aalisarnermut Naalakkersuisunit misissorneqaleruttortut Naalakkersuisoqarfiup nalunaarutigaa, 2015-imilu umiatsiaararsorluni qaleralinniarnissamut, saarullinniarnissamut assagiarsunniarnissamullu akuersissutit atuunneri sivitsorneqarput, 2016-imi atuussinnaanissaat qulakkeerneqarluni. Naalakkersuisut taama nalunaaruteqarput.
Aqutsiveqarfinnili Upernavimmi, Uummannami Qeqertarsuullu Tunuani aalisariutit 6 meterinit anginerit aalisarsinnaanermut akuersissutinik januaarimi nassinneqassapput, akuersissutit ukiumut pisassanik allaffigineqarsimassallutik.
2015-imut aalisarsinnaanermut akuersissutit taamaammat aappaagu januaarip 31-ata tungaanut atuutissapput, ukioq manna decembarip 31-ata kingorna aalisaannartoqarsinnaassalluni.
Sinerissap qanittuani aalisarsinnaanermut akuersissutit aalisariutinut 6 meterinit anginerusunut aqutsiveqarfik Upernavimmi, Uummannami Qeqertarsuullu Tunuata avataani qaleralinniarnissamut sinerissallu qanittuani saarullinniarsinnaanermut akuersissutit ulluni makkunani nassiussuunneqarput, 2016-ilu aallartisimalerpat aalisaannartoqarsinnaassalluni.
Avataasiortunut pisassiissutit agguarneri Naalakkersuisut ippassaani decembarip ulluisa 29-anni akuersissutigivaat, ingerlatseqatigiillu aalisarsinnaanermut akuersissutissaat aamma nassiussuunneqarnikuullutik.
