Siunnersuisoqatigiit plastikkimik mingutsitsinerup annertussusia misissortikkusukkaat
Siunnersuisoqatigiinni ilaasortaasut 18-iusut Reykjavikkimi ukiumoortumik ataatsimiinnerminni naammasseqqammersumi taama aalajangiipput, Nunat Avannarliit Killiit Siunnersuisoqatigiivi tusagassiorfinnut nalunaaruteqarlutik taama allapput.
Misissuinerup saniatigut plastikkimik atuinerup millisarneqarnissaa aammalu nunaminni nunarsuarlu tamakkerlugu mikroplastip atorunnaarnissaata sulissutigineqarnissaa nunat ilaasortaasut kaammattuutigaat.
Siunnersuisoqatigiit kaammattuuteqarnerminnut atatillugu plastikkimik mingutsitsinerup imaanut ilungersunartuunnera erseqqissaatigaat. Tamannalu pingaartumik nunanut avannarlernut killernut, Nunatsinnut, Savalimmiunut Islandimullu sunniuteqarpoq, nunat taakku imaani pisuussutit pisariaqartilluinnarmatigik.
AAMMA ATUARUK Erik Jensen Nunat Avannarliit Killiit Siunnersuisoqatigiivisa ukiumoortumik ataatsimiinneranni peqataasoq
Siunnersuisoqatigiit plastikkimik mingutitsinerup akiorniarneqarnissaanik kaammattuuteqarnermik saniatigut nunanut ilaasortaasunut allanik marlunnik aamma kaammattuuteqarput.
Aalisarnerup iluani ilinniartitaanerit pillugit suleqatigiinnerunissaq noqqaassutigaat, ilaatigut imarmiunik pisanik tamakkiisumik atuinermut, aalisarnermi teknologiimut nutaaliornermullu tunngatillugu.
Aamma suleqatigiissitaliortoqarnissaanik noqqaassuteqarput, taakkulu nunat avannarliit killiit erinarsuutaannik, nuutinik ileqqorsuutinillu imalimmik, atuakkiortoqarnissaa sulissutigissavaat.
Nunat Avannarliit Killiit Siunnersuisoqatigiivi nunat ilasortaasut, Nunarput, Savalimmiut Islandilu, tamarmik immikkut arfinilinnik ilaasortaatitaqarfigaat, taakkulu nunat inatsisartuinut inassuteqarlutillu kaammattuuteqartarput.
