Palæstiinamiut erfalasuat Malmö Arenami Eurovisionimut nassarneqaqqusaassanngitsoq
![](/sites/default/files/styles/image_934x467/public/2024-05/20240430-183955-L-1920x1306we.jpg?itok=Zp3oet12)
Palæstiinamiut erfalasuat nipilersornermik Europami unammisitsinermi Eurovision Song Contestimi nassarneqaqqusaanngilaq. Sverigemi Malmømi sapaatit akunnerata tulliani unammisitsisoqassaaq.
European Broadcasting Union, EBU, unammisitsinermik aaqqissuisuusoq, taama aalajangerpoq.
Sverigemi aviisi Göteborgs-Posten taama allappoq.
Tassa Palæstiinamiut erfalasuat, allagartarsualiallu politikkikkut isummanik oqaasertallit inerteqqutigineqarput.
Erfalasunillu allagartarsuanillu nipilersornermik unammisitsivimmut Malmö Arenamut nassaraanni iseqqusaasoqarnavianngilaq.
Nunat unammisitsinermi peqataasut erfalasui taamaallaat nassarneqarsinnaapput. Eurovisionip nittartagaani tamanna atuarneqarsinnaavoq, neriusaatullu
qalipaatilimmik suiaaqatigiit ilisarnaatigisaannik erfalasoq aamma nassarneqarsinnaatitaavoq.
Nipilersornermik Europami unammisitsineq Eurovision sapaatit akunnerata tulliani marlunngornermi aallartissaaq, semifinali siulleq tassani aallartissalluni.
Semifinalillu aappaat sisamanngornermi pisussatut taava aaqqissuunneqassaaq, arfininngornermilu finalertoqassalluni.
Palæstiinamiut aqutsisui Hamasimeersut Israelillu akornanni Gazami sorsuttoqarnera akerliuffiginiarlugu Palæstiinamiut erfalasuat akerliussutsimik takutitsisunit atorneqakkajuppoq.
Palæstiinamiunik Eurovisionimi peqataasoqanngilaq, Israelilili nipilersornermik unammisitsinermi peqataatitaqarluni.
Israelip unammisitsinermi peqataatitaata, Eden Golanip, erinarsugaata "October Rain"-ip taallartaa allanngorteqquneqarpoq.
Hamasip Israelimik oktobarip ulluisa arfineq-aappaanni saassussineranut eqqaanarpallaarsorineqarmat, EBU-mit allanngorteqquneqarpoq maannalu "Hurricane"-mik taaguuteqarluni.