Ukraine sorsunnermik eqqugaasoq Eurovisionimi ajugaavoq

Europamiut nipilersornikkut unammersuarneranni det europæiske Melody Grand Priximi Ukrainemiut ippassaq unnukkut ajugaarujussuarput taamaalillutillu tullissaanik Melody Grand Prixertoqalerpat qaaqqusisuusinnaalerlutik
Kalush Orchestra Eurovisionimi ajugaapput. 631 pointinik taaguunneqarnertik ajugaarujussuassutigaat. Assi © : Marco Bertorello/Ritzau Scanpix
Allattoq Ritzau
maajip 15-at 2022 12:16

Europamiut erinarsorlutik unammersuartarneranni Det Europæiske Melody Grand Prix-imi, Italiami ippassaq unnukkut ingerlanneqartumi nipilersoqatigiit Ukrainemit sorsunnermik eqqugaasumeersut ajugaarujussuarput.

Nipilersoqatigiit Ukrainemeersut Kalush erinaatertik "Stefania" ajugaassutigaat.

Europami 1956-imiilli Melody Grand Prix-ertoqartarnerani Ukrainimiut taamaalillutik pingajussaannik ajugaapput.

Europamiut Melody Grand Prix-ertarnerisa oqaluttuarisaanerani peqataasunik pointilersuinerit siullerpaamik ippassaq unnukkut marluupput, tassa Europami nunat ataasiakkaat pointilersuinerisa saniatigut Europami innuttaasut sms-ikkut App-ikkullu aamma taasitinneqarmata.

Nunat ataasiakkaat taasimmata Tuluit ajungaagaluarput Europamili innuttaasut taasitinneqarmata Ukrainimiut ajugaarujussuarput.

Melody Grand Prix ajugaasut nunaanni pisarpoq, Ukrainimili maanna sorsuttoqarnera peqqutigalugu Ukrainemiut tullissaanik unamminissami qaaqqusisuunissamut naaggaarsinnaapput, taamaassappallu Melody Grand Prix Europami nunami allami ingerlanneqassaaq.

Europami nunat ippassaq unnukkut 66-issaannik Melody Grand Priximut Danmarkimeersut anngutinngitsoorfigisaannut nipilersortartut nunanit 40-neersut peqataapput.

Russit Italiami Melody Grand Prix-imut tamatumuuna peqataatitaqanngillat. 

 

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq