Erik Jensen Nunat Avannarliit Killiit Siunnersuisoqatigiivisa ukiumoortumik ataatsimiinneranni peqataasoq
Nunat Avannarliit Killiit Issittumi nukittooq qulequtaralugu Nunat Avannarliit Killiit Siunnersuisoqatigiivisa ukiumoortumik ataatsimiinnerat Islandimi illoqarfiit pingaarnersaanni Reykjavikkimi ippassaq sisamanngornermi aallartinneqarpoq, Naalakkersuisut tusagassiuutinut nalunaaruteqarlutik taama allapput.
Savalimmiuni, Islandimi Kalaallit Nunaannilu nunanut allanut tunngasunut naalakkersuisut oqalugiarnerminni erseqissaatigaat nunat avannarliit killiit siunissami Issittumi nunap inissisimanera qanoq atorluaasinnaasoqarsinnaanera, taamatullu issittoq pillugu apeqqutini suleqatigiinnerup sutigut nukittorsarneqarsinnaanera.
Ataatsimiinnermi peqataavoq Naalakkersuisunut ilaasortaq Erik Jensen, Suka K. Frederiksen napparsimasoq taarserlugu ataatsimeeqataasoq.
Erik Jensen oqalugiarnermini ersarissarpaa nunat taakku pingasut issittumi oqallinnermi sunniuteqarsinnaaneq maannamut periarfissat pioreersut atorlugit pisinnaasoq.
Kalaallit Nunaata sunniuteqarsinnaaffigisai tassaallutik Nunani Issittuni Siunnersuisooqatigiit, Nunat Avannarliit Ministeriisa Siunnersuisoqatigiivi aammalu Nunat Avannarliit Siunnersuisooqatigiit, Naalakkersuisut tusagassiuutinut nalunaateqarlutik taama allapput.
Nunat Avannarliit Killiit Siunnersuisoqatigiivisa ukiumoortumik ataatsimiinnerat ullumi tallimanngornermi nanginneqassaaq.
