Siunersiuineq mittarfissat aningaasaqarnerannut tunngassasoq
Attaveqaqatigiinnermut naalakkersuisoq Karl Frederik Danielsen, Inatsisartut ataatsimiititaliaannit marluusunit, tassa sanaartornermut ataatsimiititaliamit aamma aningaasaqarnermut akileraartarnermullu ataatsimiititaliamit mittarfissat sanaartorneqarnerat Qaqortumilu mittarfiliornissami neqeroortitsinerup taamaatinneqarnera pillugit ullumi qulinut siunersiorneqassaaq.
Aningaasaqarnermut akileraartarnermullu ataatsimiititaliap Qaqortumi mittarfissap qanoq akeqarnera sanaartorneqarnissaalu Naalakkersuisunit qulakkeerniarneqassanersoq apeqqutaannut ilaapput.
AAMMA ATUARUK Mittarfiliornissamik suliniutissaq ukiuni 10-ni oqallisigineqareerluni piariilersoq
Aningaasaqarnermut akileraartarnermullu ataatsimiititaliami siulittaasup tullia Muté B. Egede susoqarpiarneranik paasisaqarusuppoq.
- Susoqarpiarnersoq massakkut killiffik qanoq innersoq takkua minnerpaamik akineqarnissaat pisariaqartippagut. Inuiaqatigiit aningaasaataat milliardilippassuit atorlugit aningaasaliisoqarpoq. Maannalu takusinnaasagut aallaavigalugit sinaakkusiunneqartut sinningaatsiarlugit akeqalersinnaaneranut killittoqalernera paasisariaqarparput, Múte B. Egede KNR-imut oqarpoq.
AAMMA ATUARUK Ataatsimiititaliaq Qaqortumi mittarfik pillugu ammasumik siunersiuisitsiniartoq
Ineqarnermut attaveqaqatigiinnermullu naalakkersuisup, Karl Frederik Danielsenip siunersiorneqarnissaa pillugu KNR-imit apersorumagaluarparput, pisorli pillugu siunersiuineq sioqqullugu apersorneqassanngitsoq allattaa KNR-imut oqarpoq.
Inuiaqatigiit aningaasaataat
Inuiaqatigiit aningaasaataat atorlugit mittarfiliortoqarmat pisut inuiaqatigiinnit paasineqartariaqartut aningaasaqarnermut ataatsimiititaliami siulittaasup tullia oqarpoq.
- Uani inuiaqatigiit aningaasaataat pineqarmata inuiaqatigiillu atugarissaarnerisa eqqornerlunneqannginnissaat uagut qulakkiigassarigatsigu inatsillu aamma aallaaviusoq qanoq malinneqarnersoq qulakkiigassaralugu, Múte Bourup Egede oqarpoq.
Aningaasaqarnermut ataatsimiititaliap naalakkersuisumut apeqqutai:
Apeqqut 1: Ernumananngitsuunngilaq KAIR-imiit aallaqqaammulli siunertaasimappat Munckikullu oqarfigineqarsimappata, Inatsisartut sinaakkutissatut aalajangeriigaasa iluanni neqeruussasoq, piffissallu ingerlanerani akisunerulissappat immikkut aningaasaliisoqarnissaa periarfissatut isigineqarsimalluni. Tamanna aallaqqaataaniilli pisimava?
Apeqqut 2: Mittarfiliortiternerit qanoq killiffeqarpat sanaartornerillu qanoq siuariartorpat. Qanoq coronap ajornartorsiortitsineranik suliaq atlantiku qulaallugu timmisartuussinermut mittarfissanik sanaartornermut sunniuteqarsimava. Naalakkersuisut isumaat malillugu ulorianaateqarsinnaasut suut immikkut maluginiagassaappat. Aningaasaqarniarneq eqqarsaatigalugu ajornerpaamik qanoq inissittoqarsinnaava kiisalu allatut pilersaarutaasinnaasunik il.il. piareersimasuuteqartoqarpa?
Apeqqut 3: Nuummi Ilulissanilu mittarfissanut aningaasartuutit amerlipiluussagaluarpata danskit naalagaaffiannit saniatigut aningaasaleeqqittoqarsinnaanera Naalakkersuisunit isumaliutigineqarsimava? Missingersuutit annertusissappata, tamanna 33 procentimik aningaasaliissuteqarnermut tassunga saniatigut piumasaqaateqarnissap pisariaqalerneranik nassataqassanngila?
Apeqqut 4: Qaqortumi mittarfissaq qanoq akeqassava? Qaqortumi mittarfissap sananeqarnissaa qanoq Naalakkersuisunit qulakkeerniarneqarpa?
Apeqqut 5: Mittarfiliortiternerit pilersaarutaasut naapertorlugit naammassineqarnissaat Naalakkersuisunit naatsorsuutigineqarpa? Taamaattoqanngippat suliniut akisunerulissava, kikkullu tamatuminnga akiliissappat? Coronap nunarsuarmi tamarmi aningaasaqarnikkut pitsaanngitsumik sunniutai, ukiunilu tulliuttuni atuutiinnartussatut naatsorsuutigineqartut mittarfiliortiternerit pillugit aalajangernermik isumaliutiginneqqinnissamik pisariaqalersitsinngillat?
Apeqqut 6: Sanaartortut kinguaattoornermik akiliiumajunnaassappata tamannalu pillugu KAIR-imik eqqartuussivilersuussillutik, tamanna piginneqataasunut qanoq kinguneqassava? - Taama pisoqarsinnaanera sillimaffigineqartariaqarmat – tamanna aamma aningaasaqarnikkut.
Apeqqut 7: Kinguaattoorneq nassuerutigalugu, inatsimmut mittarfiliortiternernut sinaakkusiisumut allannguutissatut siunnersuuteqarsinnaaneq Naalakkersuisunit isumaliutigineqarsimava?
Apeqqut 8: Kinguaattoorneq qanoq akeqassangatinneqarpa? 800 mio. koruunit tusagassiorfitsigut (sermitsiakkut) tagginneqartut ilumoortuunersut tusassallugu innuttaasunit pisariaqartinneqarpoq. Sermitsiami saqqummiunneqartut ilumoorpat?
Apeqqut 9: Maanna killiffimmi sanaartornermut piffissalersuineq kiisalu suliniutip akia pillugit KAIR-ip kiisalu MUNCK-ikkut akornanni isumaqatigiinngittoqarpa?
Apeqqut 10: Kinguaattoorneq aningaasaqarnikkut annertuumik kingunerlutsitsissagaluarpat ataatsikkut mittarfiliortiternerit nalilersuiffigeqqinnissaat Naalakkersuisunit isumaliutigineqarpa?
Apeqqut 11: Kinguaattoorneq mittarfiliortitsinerillu ataatsikkut ingerlatiinnarumallugit aningaasanik nunanut allanut attartornissamik naalakkersuisut eqqarsaateqarunik, qaqugu tamanna inatsisartunut saqqummiutissamaarpaat?
Apeqqut 12: Mittarfiliortiternernut atatillugu kommuninut isumaqatigiissutit malinneqarpat? Mittarfiit tungaannut aqquserngiornerit matumani pineqarput.
Apeqqut 13: Qaqortumi mittarfissamut tunngatillugu naalakkersuisut allatut eqqarsaateqarpat? (Nuummi Ilulissanilu mittarfiliornerit assigalugit nunanit allaneersunik/soqutigisaqaqatigiinnik aningaasaliisoqarluni imaluunniit tapiissuteqartussarsiorluni).
Apeqqut 14: Mittarfiliortiternerit pillugit Inatsisartut novembari 2018-imi isumminnginneranni Naalakkersuisut Kalaallit Airportilu aalajangernissamut tunngavissiamik Inatsisartunut ilaasortanut saqqummiussipput. Aalajangernissamut tunngavissiaq, misissuinernik imaqartoq mittarfinnut aktiaateqarluni ingerlatseqatigiiffimmit pilersinneqartussanut ingerlanneqartussanullu kiisalu (Qaqortumi) mittarfissamut nunatta karsianit aningaasalersorneqartussamut tunngassuteqarpoq. Aalajangernerup kingorna piffissaq taama sivikitsigisoq ingerlareersoq susoqarsimava, aningaasartuutissatut naatsorsuutigisanik sinaakkusiussanillu taama annertutigisumik nikingasoortitsisumik? Tunngavissiat Inatsisartunut saqqummiunneqartut aallaqqaataaniilli piviusorsiortuusimappat?
Tusarfik: Inatsisartut akileraartarnermut aningaasaqarnermullu ataatsimiititaliaat.
