Ataatsimiititaliaq Qaqortumi mittarfik pillugu ammasumik siunersiuisitsiniartoq

- Suliaq sooq taama inerneqarsimanersoq pillugu Naalakkersuisut nassuiaateqarsinnaanissaat naatsorsuutigaarput.

Inatsisartut aningaasaqarnermut akileraartarnermullu ataatsimiititaliaata siulittaasua, Hermann Berthelsen (Siumut) KNR-imut oqarpoq.

Kalaallit Airportsimmi Qaqortumi mittarfiliornissaq unitsikkallarpaa.

AAMMA ATUARUK Qaqortumi mittarfiliornissamut suliariumannittussarsiuussineq taamaatiinnarneqartoq

Mittarfimmimmi sanaartornissaq qularnarseqqavoq. Ingerlatseqatigiiffiit tallimat suliniummut suliariumannittussarsiuussisoqarnerani neqerooruteqarput, neqeroorutilli tamarmik Kalaallit Airportsip missingersuutaanit annertunerungaatsiarput.

Taamaammat Qaqortumi mittarfiliortoqarsinnaanissaanut suliniummi allannguisoqassaaq. Sanaartornissamut amerlanerusunik aningaasassarsiortoqanngikkuni mittarfik 1500 meterisut takissuseqartoq allanngortinneqassaaq.

Suliariumannittussarsiuussinerup taamaatiinnarneqarnera Kommune Kujallermut Qaqortumilu inuussutissarsiuteqarnermut pakatsinarluinnarpoq.

Attaveqatigiinnermut naalakkersuisulli, Karl Frederik Danielsenip (Siumut) Qaqortumi mittarfittaartoqarumaarnera KNR-imut siusinnerusukkut qularnaveeqqusernikuuaa.

- Qaqortumi mittarfeqalissaaq, aap. Kisianni qaqagu neqeroortitsisoqassanersoq qanorlu neqeroortitsisoqassanersoq apeqqutaassaaq. 

Kalaallit Airportsip nutaamik aappaagu suliariumannittussarsiuussinissaq naatsorsuutigaa.

Suli ullulerneqanngitsoq

Inatsisartut aningaasaqarnermut akileraartarnermullu ataatsimiititaliaata qanoq ililluni ajutoortoqarnera maanna akissuterserusuppaa.

- Suliniut inuiaqatigiinnit soqutiginaateqarpoq. Taamaammat ataatsimiititaliami tamatta Naalakkersuisut ammasumik siunersiuinissamut aggersarnissaat isumaqatigiissutigaarput. Naalakkersuisut paasissutissiissutigisinnaasaminnik saqqummiinissaat naatsorsuutigaarput, Hermann Berthelsen oqarpoq.

Qaqugu siunersiuisitsisoqassanersoq suli ullulerneqanngilaq. Kisianni sapaatip-akunnerata tulliani pissasoq, Hermann Berthelsenip oqaatigaa:

- Oqaatigiinnarsinnaavara aalajangiineq ataatsimoorluta aalajangiiffigaarput. Qaaqqussuteqarnissarput apeqqutissagullu maanna sulissutigaagut.

Ammasumik siunersiuineq isumaqarpoq tamanna tamanut ammasuussasoq.

Nunatta oqaluttuarisaanerani aatsaat pingasoriarluni ammasumik siuinersiuisitsisoqassaaq.