Siumut: Politikerit atorfilittanit aqunneqarpat?
- Pisortaqarfinni qullersaasut pissaanermik tigumminninnerat naalakkersuinermik akisussaasut misissortariaqalerpaat, Jens Immanuelsen oqaluttarfimmit ilaatigut taama oqarpoq nangillunilu:
- Ersarippallaarpoq pissaaneq angivallaartoq pisortaniinnera.
Taassuma oqaaseqarnermini aamma piniarnermut allagartallit allagartaajarneqartartut eqqaavai:
- Ilumut oqartariaqarpugut politikerit avaqqullugit atorfilittat pissaaneqarpallaalersimanerannut takussutissaava?
- Naalakkersuisut pissutsit aaqqinnissaannut suliaqartariaqalerput aamma atorfilittat naalakkersuinikkut siunniussanut suleqataasariaqalerput Naalakkersuisullu sukannernerusumik aqutsisariaqalerput. Siumup piumasaa paatsoorneqarsinnaanngitsoq unaassaaq: Politikkikkut nunarput aqunneqassaaq.
Politikerit sanngiitsut aqunneqartarput
- Gangini oqallinneq qiviaraanni, ilaatigut isumaqartoqartarpoq atorfilittat pissaaneqarpallaartut. Kisianni inatsisiliortut inatsisiliaasa malitsinneqarnerat atorfilittat suliarisarpaat, taanna ilisimavarput. Taamaakkaluartoq taanna nipituumik oqaatigerusussimavarput, isumaqaratta Naalakkersuisut periarfissinneqartariaqartut ullumikkut sanngiitsumik inissisimaneq apeqqutini uteqattaartuni, siunissami qaangerneqassappat taanna qulaajaanermut ilaasariaqartoq, apeqqusiineq oqallinnermut sooq ilanngussimanerlugu Jens Immanuelsenip taama nassuiarpaa.
Taamatulli saqqummiussinera Partii Naleqqamit Inatsisartunut ilaasortap Anthon Frederiksenip allatut paasivaa:
- Partii Naleqqami isumaqarpugut Siumut partiini anginerpaajulluni taamatut oqariartornera nassuernerusoq. Imatut paasivagut Siumup Naalakkersuisuutitai atorfilittanik aqunneqarsimasut. Pissusissamisuunngilaq. Atorfilittat naalaganngortinneqarsinnaanngilluinnarput, taamaattoqassappat assorujussuaq eqqumiissooq, Anthon Frederiksen oqarpoq.
Taannalu Inuit Ataqatigiinneersumit Agathe Fontainimit taperserneqarpoq.
- Tassa takussutissaavoq Naalakkersuisut tunuliaquteqanngitsut inatsisartunut ilaasortaminninngaannit. Isornartorsiorneqarput annertoorujussuarmik. Naalakkersuisunut pingaartorujussuuvoq inatsisartuni ilaasortat gruppiminngaanniit tunuliaqutitik qanimut suleqatiginissaat. Uanilu oqaatigineqartut ersarissitippaat taanna piunngitsoq, Agathe Fountain oqarpoq.
Naalakkersuisut atorfilittanik aqutsisuupput
Aningaasaqarnermut aatsitassanullu naalakkersuisup Andreas Uldumip Siumumit apeqqusiineq itisuumik qisuariarfiginngilaa. Naalakkersuisulli atorfilittanit aqunneqarnerarlugit oqalunneq illuatungilerpaa:
- Taanna imatut paasivara oqallissaarutitut saqqummiukkaat. Aqutsivallaarpat? Taannalu ima akerusuppara: Naagga, uagut Naalakkersuisut atorfilittavut aquppagut, Andreas Uldum naqissusiivoq.
