Siumut Socialdemokratillu suleqatigiilluarneruniartut
Socialdemokratit siulittaasuata, Mette Frederiksenip, partii Siumut aasaanerani Qaqortumi katerisimaarnerani peqaatanera iluatsillugu, suleqatigiinnermut isumaqatigiissutaat nutarterneqarpoq.
- Isumaqatigiissutikkut nutarterneqartukkut ilaatigut allaffeqarfiit akornanni suleqatigiinneq nukittorsarneqassaaq. Pingaaruteqarluinnarpoq partiit marluulluta siunissami ilisimasanik atuilluarnissarput aamma ataatsimoorussamik aaqqiissutaasinnaasumik atorluaanissarput, Siumut siulittaasua Kim Kielseni tusagasiuutinut nalunaarummi taama oqaaseqarpoq.
Aamma atuaruk Siumut Qaqortumi ataatsimiisitsisoq
Siumut aasaanerani katerisimaaneranut Mette Frederiksenip qaaqqusaanini tigulluarumammagu Kim Kielsenip nuannaarutigivaa.
- Isumalluarnarpoq Mette-p aasaanerani sulinngiffeqarnini atorluarlugu Kalaallit Nunatsinnukarmat, Naalagaaffeqatigiiffiup ilaa paasisaqarfigiumallugu, Kim Kielsen oqarpoq.
Mette Frederiksenip Kalaallit Nunaannut tikeraarnermini Naalagaaffeqatigiinnermi periarfissat unammillernartullu paasiniaaffigerusullugit nalunaarummi oqaatigaa.
- Tungaviusumik isumaqarpunga ajornartorsiutit ataatsimoorluta suliarilluarnerusinnaagigut periarfissallu nutaat atorluarnerusinnaagigut. Taamaattumik nuannaarutigaara suleqatigiinnermut isumaqatigiissut nutarterneqartoq atsioqatigiissutigigatsigu partiinut tamanut iluaqutaasussamik, Mette Frederiksen nalunaarummi oqaaseqarpoq.
Aamma atuaruk Mette Frederiksen Nunatsinni angalasoq
