Mette Frederiksen Nunatsinni angalasoq
- Kalaallit Nunaannut tikeraarninni Naalagaaffeqatigiinnerup aaqqissuussaanera paasisaqarfigilluarnerussallugu qularinngilluinnarpara, Mette Frederiksen oqarpoq.
Taassuma Nunarput siullerpaamik tikeraarpaa. Nunatsinniinnerminilu makku ilaatigut peqataaffigisimalereerpai: SIK-p ukiut 60-inngortorsiornera, Naalakkersuisut aatsitassarsiorfeqatigiillu ataatsimeeqatigalugit.
Nunatsinnilu eqqartuussisoqarneq socialdemokratineersup aamma misissuiffigaa.
- Isertitsivik, pinerluttunik isumaginnittoqarfik, politeeqarneq, unnerluussisuutitaasut eqqartuussisullu, tassami tamakku pingaaruteqarluinnartuummata, Mette Frederiksen oqarpoq.
Eqqartuussisoqarfiup iluani taama sulisoqartarnera tupigusuutigaa, isertitsivimmullu inissinneqartut amerlasuut pinerloqqittartut maluginiarlugu.
Pinerluttunik isumaginnittoqarfiup ajornartorsiut kisimiilluni suliassarinngimmagu Kalaallit Nunaat Danmarkilu ataatsimut suleqatigiillutik ajornartorsiut aaqqiivigisinnaagaat Mette Frederiksen isumaqarpoq.
- Imigassamik aalakoornartortalimmik atornerluineq ikiaroortarnerlu pissutaaqataapput. Tarnikkullu nappaateqarneq isertitsivimmiittut ilaasa ajornartorsiutigaat, ataqatigiissaarluakkamillu suleqatigiinngikkaanni tamanna aaqqiivigiuminaassaaq.
Namminersorluni oqartussaanermi inatsit 2009-meersup atuutsinniarnissaa Kalaallit Nunaannut Danmarkimullu suliassarujussuusoq Mette Frederiksen isumaqarpoq.
- Nunat marluuvugut, unammilligassallu ataatsimoorluta akisussaassuseqarlutalu suliassaraagut.
Partiilu suleqatigisap Siumut aasaanerani Qaqortumi naapisimaarneranni Frederiksen peqataanissaminut piareersaleruttorpoq.