Siumut Nuuk ilannguttoq: Partiitta siunnerfia ersarluppoq

Siumup tunuliaqutaasa ilarpaaluisa partii piffissami kingullermi isornartorsiortarpaat. 

Naalakkersuisoqatigiit, aalisarnermut inatsit aatsitassarsiornermullu inatsit isornartorsiorneqarput, tamannalu qinersinermik kinguneqartariaqartoq Siumup tunuliaqutaasa ilaat isumaqarput.

Siumup tunuliaqutaasa ilaat alla isornartorsiuisunut aamma ilannguppoq.

-  Naalakkersuisoqatigiinnassanngilagut naalakkersuisoqatigiinniarneq piinnarlugu.

Tassa Siumut Nuup siulittaasua, Qarsoq Høegh-Dam Siumup tunuliaqutaasa ilaasa partiimik isornartorsiunerannut ilaliilluni taama erseqqissaavoq. 

Siumup sineriammi immikkoortortaqarfiini anginerpaaq, Siumut Nuuk, partiip naalakkersuinikkut killiffianik isornartorsiuisunut aamma ilannguppoq. 

Tassami Siumut Nuuk Siumup immikkoortortaqarfiisa ilaasa partiip naalakkersuinikkut ingerlatsineranik naammaginninnginneraanerannut isumaqataavoq. Taakku ilaatigut aningaasat naleerunnerat, suut tamaasa akitsoqinerat, sineriatsinni inuuniarnerup ilungersunarnera taavalu Nuummi ineqarniarnerup akisuallaarujussuarnera isornartorsiuinerminnut tunngavilersuutigaat.

Siumup siuttui uparuarai

Qarsoq Høegh-Damip Siumup siuttui isertuallutik ersarluttumillu ingerlatsinerarlugit uparuarpai. 

- Taanna ersarissumik taasinnaanngikkaanni, ingammik massakkut piffissaq nalunartoq ingerlaffigisarput. Taava ernumaneq nalornineq taanna annertusiartuinnartussaavoq ersarittoqartariaqalerpoq, Siumut Nuup siulittaasua oqarpoq. 

Siumummi siuttui ersarluttumik siunnerfeqartut tunuliaqutiminullu neriorsuutiminnik eqquutsitsisanngitsut, Siumut Nuuk isumaqarpoq. 

- Siumut politikkia ersarinngikkuni taava taakkua piumasaqaatit massakkut ataqatigiinnginneri oqaluttuarineqarluanngikkunik ersarinnerunngikkunilu ingerlanneqartoq, taava taamaasilluni ernumaneq taavalu tutsuiginninnginneq taanna annertusiartuinnassaaq, Qarsoq Høegh-Dam oqarpoq. 

Siulittaasortik, Erik Jensen, partiip naalakkersuisoqatigiinni naammaginanngitsumik ingerlatsineranut peqqutaalluinnartoq, Qarsoq Høegh-Dam oqarpoq. 

Siumup siulittaasua aalassanngitsoq 

Siumup siulittaasuata, Erik Jensenip, isornartorsiorneqarnini aalassaatigingaanngilaa. Siumut Nuuk siullermeerani isumaqataanngitsoq, taassuma erseqqissaatigaa. Partiiminni ingerlaqqikkusullutik, aamma oqarpoq. 

- Nammineq isummersorniarli takanna, aamma taamatut isumaqarniaruni ajunngilaq. Taakkua oqariartuutaat tusaatissatut aamma tiguinnassavakka, Erik Jensen oqarpoq. 

- Kisianni Siumut nukittuujuvoq. Aalajangigassanilu angisuuni qununani sapiissuseqarluni siuttooqataalluni inissisimajuartarnerata attannissaa pingaarnerpaavoq, Erik Jensen oqarpoq. 

Kisianni tassa Siumut Nuuk isumaqataanngilaq, isumaqaramimi partii naalakkersuisooqataaniaannarluni suleqataasoq. 

- Siumup politikkia ingerlanneqarnerusoq Siumut politikkia ersarinngilaq, naammaginavissortutut isigineqanngilaq allannguissortoqartariaqarpoq, Qarsoq Høegh-Dam oqarpoq.