Lars-Emil Johansen: Naalakkersuisuni ullormiit ullormut ingerlatsineq ingerlanneqarpoq

Siumumi tunulequtaasut qinigaaffiup pisortatigoortumik naammassinissaanut ukioq ataaseq sioqqullugu qinersinissaq oqaluuserisalereerlugu oqallissutigisalereeraat KNR-imit saqqummiunneqarpoq. Siumup tungaanit neriuutigineqartutulli IA-p naalakkersuisoqatiginissaanut takorluukkat eqquutinngillat.

Kommunini qinikkat ilaasa piaartumik qinersisoqartariaqartoq allaat oqaatigisalerpaat.

Politikerilli sineriammiittut – naalakkersuisoqatigiit allaffiata avataanniittut – Namminersorlutik Oqartussat illorsuani politikkikkut ingerlatsinermik isumaqarnerat ataasiuvoq. Naalakkersuisulli akornanni politikikkut piviusoq aamma allaalluni.

Ikittuinnaalli taama naalakkersuisoqatigiinni suleqatigiinnermik tamatumalu saniatigut politikkikkut piviusumik pissarsiaqarnissamik ilisimasaqarput.

Naalakkersuisulli siulittaasorisimasaata, Siumumiutoqqallu, Lars-Emil Johansenip tamanna ilisimasaqarfigaa. Taamaammat KNR-ip taanna naalakkersuisoqatigiit maannakkut ilusaannut siunissamullu ilimagisaanut atatillugu oqaaseqartippaa.

- Tassa toqqissisimalluni ingerlatsisoqarpoq. Naalakkersuisut uppeqqajaanngillat, amerlanerussuteqartorujussuupput. Illuatungiliuttut qanoq iliornissartik immaqa ajornakusoortippaat. Soorlu partiit imminnut paapput, taamatut oqartoqarsinnaavoq immaqa, taanna oqarpoq, nangillunilu:

- Maannakkut tassa illuatungiliuttut ikittuarannguakkuutaarlutik nipiliortorujussuupput, pingasunik, sisamanik, tallimanik, marlunnik ilaasortallit suleqatissarsiorneq annerusumik pineqartariaqarpoq, imminut uparuartuunneq annikinnerulaartumik, qanoq iliornissamut tikkuussineq annertunerusumik ingerlanneqarsinnaapput.

Imminnut pitsaanerpaanissamut angivaallaartoq

Taamammat IA-p Siumullu naalakkersuisoqatigiinnerannut avataanit aarlerinartoqarani partiinit nammineq aarlerinartoqarpoq.

- Kisianni tassa naalakkersuisut amerlanerussuteqarnertik atorluanngilaat isumaga malillugu. Partiit marluk Siumukkut Inuit Ataqatigiillu imminnut skakmat-eqqasut ipput. Nikeriarnaveeqqallutik. Apeqqutinut pingaarutilinnut (…) nikinnaveertissimapput.

Lars-Emil Johansenip naalakkersuisoqatigiit angissusaat imminut aporaattumik taallugu Siumup IA-llu suleqatigiinnerani aporfiunerpaanerarpaa. Anginerpaagaluarlunimi tamanna aamma eqiasuffiulersinnaasarpoq:

- Periarfissaqarpoq taanna marlunnik amerlanerussuteqarujussuaraanni. Angisuunik amerlasuunik nutaanik pilersitsisoqarsinnaavoq, soorlu aningaasarsiorfissanik nutaanik. Imaluunniit ullormiit ullormut ingerlatsineq ingerlanneqarsinnaavoq toqqissisimarujoorluni. Ajoraluartumik taanna kingulleq maannakkut atuuppoq, Lars Emil Johansen oqarpoq.

Qinersinissaq immaqa - utaqqisaasoq

Siumup tunuliaqutaasa oqaatigineqartutut qinersisoqartikkusuppaat. Pingaartumillu naalakkersuisoqatigiit aalisarnermut inatsimmut utaqqineqartuartumut siunnersuutaat aalisarnermik soqutigisaqartut partiianni akerleriissuteqartitsingaatsiarpoq.

Neriorsuuterpassuit eqqutsinneqanngitsut ilungersuussallu qassiiusut politikkimi ingerlatsinermi kinguartinneqanngikkunik tammarluinnarsimapput.

Taamaakkaluartorli qinersisoqangajalernissaa Lars-Emil Johansenip ilimagivallaanngilaa.

Ukioq mannali qinersisoqassagaluarpat tamanna kingusinnerusukkut pinani siusinnerusukkut pissasoq taanna oqarpoq:

- Soorunami upernaap ingerlanerani qinersisoqarsinnaavoq, tamanna pisariaqalissappat. Aasamut qinersinissaq ajornakusuussagunarpoq, kunngikkunnik tikeraartoqarnissaq pingaartinneqartartorujussuuvoq, kunngikkut tikeraartussaapput, kunngi nutaaq.