Siumut Nuuk Hans Enoksen Siumumi siulittaasutut tunuaqquaat

Partii Siumup Nuummi immikkoortortaata naalakkersuisut siulittaasuat Hans Enoksen Siumumi siulittaasutut tunuaqqullugu ippassaq tusagassiuutinut allapput. Nuummi immikkoortortap siulittaasuata Lars-Emil Johansenip allagaqaateqarnermini ilaatigut iserfigai partiimi siulittaasussarsiortarneq. Ilaasortat taasisinneqarnerisigut siulittaasussaq qinerneqartalertariaqarpoq, Siumut Nuuk allappoq.

- Taamatut tunuaqqusitsisarnerit takornartaanngillat, Hans Enoksen oqarpoq, nangillunilu:

- Lars-Emil Johansen taamatut oqariartuuteqarpoq, 2001-imili siulittaasunngoramali taamatut oqariartaartoqartuaannaavippoq. Oqaatigissavarali nammineerlunga siulittaasutut ikkunnikuunnginnama, ataatsimeersuarnermili toqqarneqarsimallunga. Ataatsimeersuartut toqqaasarnerat ataqqilluinnarpara, Hans Enoksen oqarpoq.

Siumut Nuummi immikkoortortaata piumasaraa partiip siulersorneqarnera siulittaasuisunut tulliuttunut, tassa Jonathan Motzfeldtimut Doris Jakobsenimullu tunniunneqartariaqartoq, Siumut Nuummi immikkoortaata siulersuisui ataatsimeereernerup kingorna tusagassiuutinut allapput.

Partiip siulittaasussaannik qinersisoqartillugu ilaasortat taasisinneqartariaqalersut Siumut Nuuk ujartorpaa, Hans Enoksenilli paasisinnaannginnerarpaa Lars-Emil Johansenip siulittaasuunermi nalaani qinerseriaatsit allanngortissimannginnerai.