Siumut: Nunatta aningaasaqarnera aaqqissappat nuanniitsut ilanngunneqartariaqarput

Nuna tamakkerlugu akileraarutip procentimik ataatsimik qaffanneqarnissaa, Aningaasanut Inatsisip 2015-moortup aappassaaneerlugu Inatsisartuni ippassaq oqallisigineqarmat, Siumup aningaasaqarneq pillugu oqaaseqartartuata, Jens Immanuelsenip tamanna periarfissaasutut siunnersuutigaa.
Allattoq Apollo Jeremiassen, Sandra Meinecke
apriilip 23-at 2015 16:56

 

Siunnersuut partiinit illuatungiliuttunit tupigineqartoq isumaqatigineqanngitsorlu.

 

- Aaqqissuusseqqinnerit aningaasalersorneqarneri nalorninartoqartut pilersaarutigineqarput. Tamassuma saniatigut aamma siunnersuutaavoq akileraarutip procentimik ataatsimik qaffanneqarnissaa. Tamannalu akuersissutigineqassappat, tamanik eqquinerluttussaavoq suliffeqarfissuarmi pisortamiit SIK malillugu aningaasarsiaqartumut.

 

Inuit Ataqatigiit aningaasaqarneq pillugu oqaaseqartartuata, Naaja Nathanilesenip ilanngullugu oqaatigaa, akileraarutit pillugit aaqqissuusseqqinnissamik suliaq suleqataaffiginiarlugu Inuit Ataqatigiinnit pilersaarutigineqarmat, tassanilu pissakinnersut ulluinnarni oqilisaaffigineqarnissaat taamatullu suliffeqarnissap pilerigineqarnerulernissaata anguniarneqarneranut suleqataanissartik naatsorsuutigineqarsinnaasoq oqarluni.

 

Inatsisartuni illuatungiliuttut Parti Naleqqap aningaasaqarneq pillugu oqaaseqartartuata, Anthon Frederiksenip akileraarut qaffannagu suliffissaaleqinerup appartinneqarneratigut akileraarutit amerlanerusut isaatinneqalernissaat siunertarineqartariaqartoq siunnersuutigaa.

 

- Nunatsinni pissakinnerit aningaasanik aallerfigalugit Nunatta aningaasaqarnerata aaqqinneqarnissaa uangut Partii Naleqqamiit upperinngilarput. Aningaasanik Nunatta karsia iluanaaruteqartinniaraanni, suliffeqarfiit suliassaqartinneqarnerisigut aamma suliffissaaleqaisut ullumikkut 4.000-it missaanniittut ikilisinnerisigut, akileraarutitigut isertitat amerlineqarsinnaapput, Anthon Frederiksen oqarpoq.

 

Akileraarutip procentimik ataatsimik qaffanneqarnissaa siunnersuutit ilagiinnaraat, Siumup oqaaseqartartuata, Jens Immaneulesenip erseqqissarpaa. Taamali siunnersuuteqarnerminni naalakkersuisooqataasut partiit isumasiorneqarsimanngitsut aamma oqarluni.

 

- Partiit naalakkersuisuutitaqartut naamerluinnaq isumasiunngilagit tassami politikkikkut partiiuvugut nammineq isummersinnaasut, taamaattumillu qaffaanissamik nammineq siunnersuuteqarluta.

 

Jens Immanulsen oqarpoq. Taannalu ima apereqqippara.

 

- Illuatungiliuttut isumaqarput akileraarut qaffanneqassappat eqqorneqartussat tassaassasut pissakinnerit aalisartullu umiatsiaararsortut. Tamakku eqqorneqaraluarpataluunniit akileraarutip qaffanneqarnissaa aalajangiusimaannassavisiuk?

- Qanorluunniit pigaluarutta Nunatsinni aningaasalersugassavut pitsaasumik aningaasalersorsinnaanngilagut, tamanna pisinnaanani ullumikkutut ingerlatilluta. Taamaattumik nuanniitsut ilanngullugit eqqartorsinnaasariaqarpavut.

 

Siumut sinnerlugu Inatsisartuni ilaasortaq, Jens Immanuelsen taama oqarpoq.

Aamma atuaruk