Siumut: Kommunimut qinersineq nukillaartippaat
Isornartorsiuneq saqqummiunneqarpoq, Siumup aaqqissuussanermut siulittaasuata tullianit Vittus Qujaukitsumit.
Tamanna pivoq, partiit, IA, Atassut aamma Kattusseqatigiit Partiiat kommuunimut qineqqusaarnissamut aningaasatigut tapiiffigineqarnissamut itigartinneqareersut.
Nunamut Namminermut Naalakkersuisoqarfik partiit qineqqusaarnissamut aningaasatigut tapiifigineqarnissaminnut qinnuteqaataat itigartitsissutigaa, aningaasanut inatsimmi kommunimut qinersinissami qineqqusaarnissamut aningaasanik immikkoortitsisoqarsimanngimmat.
Tamanna Siumup sakkortumik isornartoqartippaa.
Vittus Qujaukitsup oqarnera naapertorlugu, partiit politikkikkut sulinerannut aningaasatigut tapiiffigineqartarnerat inatsisartut inatsisaat naapertorlugu, partiit nunaqarfinni aqutsisunut, kommuninut imaluunniit inatsisartunut qinersinissaq sioqqullugu tapiiffigineqarsinnaapput.
- Allassimanngikaluartoq ileqquuvoq qinersinermut suugaluartunut immikkut tapiissuteqartoqartarnera. Partiit nalinginnaasumik ingerlatsinermi saniatigut qineqqusaarnissaminnut akissaqanngillat immikkut tapiffigineqanngikkunik, Vittus Qujaukitsoq oqarpoq.
Aningasaat qinersinermut tapiissutaasartut amerlanersaat angalanermut aningaasartuutinut qineqqusaarnermi atortunik suliaqarnermut siaruarterinermullu atorneqartartut, Vittus Qujaukitsoq erseqqissaavoq.
Taassuma ilanngullugu oqaatigaa, innuttaasut kommunimut qinigassanngortittunik naapitaqarnissaminnut periarfissaat ajornerulissasut, partiit qinersinissamut tapiiffigineqanngippata.
- Kommuunit kattussuunerisa kingorna qinersisartut kommuninilu qinikkat akornanni qunneq annertoreerpoq, sulilu inuttaasut qineqqusaartunik naapitsinissaminnut periarfissaat ajornerulissapput, Siumup aaqqissuussaanermut siulittaasuata tullia oqarpoq.
Vittus Qujaukitsup Naalakkersuisut kaammattorpai piaartumik aaqqiissutissamik naasaarniaqqullugit kommunimut qinersineq nalinginnaasumik ingerlanneqarsinnaaniassammat.
