Siumut: Inatsisissatut siunnersuut affaannarmik suliaavoq!

Suliniutinut angisuunut inatsisissatut siunnersuut, Inatsisartut Inuussutissarsiornermut ataatsimiititaliaata suliaa naammassivoq. Taama isumaqarput ataatsimiititaliami partiit ilaasortaatitaat amerlanerussuteqartut.

Siumumilli ilaasortap oqaatigaa, suliaq affaannarmik suliaasoq pitsaanerusinnaagaluartorlu.

- Siumumit isumaqarpugut, sivisunermik piffissaqarsimasuugutta pitsaanerujussuarmik inatsisiliorsimassagaluarluta, Inuussutissarsiornermut ataatsimiititaliami ilaasortaq, Karl Lyberth, Simut taama oqarpoq.

Piffissaqartitaarpiarani suliap amigartumik suliarineqarnera pissutigalugu, ataatsimiititaliami Siumup ilaasortaatitai pingasuusut, inatsisissamut akuerseqataanatillu itigartitsiniaratik isumaqatigiissimapput.

Isumaqataannginnerminnut ilaatigut assersuutitut, Karl Lyberthip taavaa, suliffissuarni pilersinneqartussani inuusuttut ilinniartitaasarnissaannik inatsimmi ammaassisoqarsimannginnera.

- Nunatsinni inuusuttatta ilinniarnissaannut periarfissaat inatsimmi ammaanneqarsinnaasutut Siumumit isigigaluarparput, takunnissinnaanerpulli malillugu periarfissaq taanna ilanngunneqanngilaq, Karl Lyberth oqarpoq.

Karl Lyberthip assersuutitut ilanngullugu oqaatigaa, aatsitassarsiorfiit aallartisarneqarneranni ajutoortoqartillugu, napparsimmaveqarfiup isumannaatsumik peqataaffigalugu suliarisinnaaneraa, ataatsimiititaliap sukumiisumik eqqartorsimasinnaagaluaraa. Karl Lyberth-illi taamaattoqarsimannginnerarpaa.

Inuussutissarsiornermut ataatsimiititaliap siulittaasua, Naaja Nathanielsen tamanna pillugu ima akivoq.

- Taasatit taakku isumaliutissiissummi ikinnerussuteqartunit taaneqanngillat, taamaattumillu tamanna tusaatissatut tiguinnarsinnaallugu. Nammineerlunga isumaqarpunga partiit tamatta ataatsimiititaliami ilaasortaasugut periarfissaqarsimagatta nalornisatsinnik erseqqissaanisatsinnut isumaliutissiissutip saqqummiutinnginnerani. Saqqummiussarput uanga nammineerlunga nuannaarutigaara. Suliarput tuaviuussaanngilaq, isumaqarpungalu politikikkut pisussaaffipput naapertorlugu naammassissaqarsimalluta, Naaja Nathanielsen, Inuit Ataqatigiinneersoq oqarpoq.

Taanna isumaqarpoq, inatsisissamut siunnersuummi pingaaruteqarluinnartunik ataatsimiititaliaq siunnersuuteqartoq, soorlu assersuutitut taavaa, suliniutit aallartinneranni sanaartornermut aningaasartuutit malilllugit, 1 milliard koruuniniit 5 milliard koruuninut aningaasartuuteqartut immikkoortinneqarneranni, taakku qaqugukkut suliassat annertuutut isigineqartariaqalissanersut siunnersuutigineqarsimalluni.

- Allannguutissatut erseqqissagarput una nuannaarutiginerpaavara tassalu, suliassanut annertuunut akuersinnginnitsinni, IBA-mik isumaqatigiissummut atatillugu sulisartut kattuffiinut, sulisitsisunut Naalakkersuinikkullu attuumassuteqanngitsumik suliniaqatigiiffinnut, inatsisissap ersarissarneqarnera, Inuussutissarsiornermut ataatsimiititaliap siulittaasua, Naaja Nathanielsen oqarpoq.

Suliniutinut angisuunut inatsisissamut siunnersuut Inatsisartuni aappassaanik suliarineqassaaq decembarip arfernganni, pingajussaaneerneqassalluni decembarip arfineq aappaanni.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat