Siumut avannaani amerlanerussuteqaqqilerpoq

Timooq Mølgaard aamma Abel Karlsen sapaatip akunnera kingulleq partiiminnit tunuartut maanna Siumumi ilaasortanngorput, taamaasilluni Siumut Qaasuitsup Kommunalbestyrelseani amerlanerussuteqaqqilerpoq.
Allattoq Noah Mølgaard
januaarip 14-at 2013 07:17

Siornatigut Atassummi ilaasortaq Qaasuitsup Kommunianilu borgmesterip tullia siulleq Timooq Mølgaard aamma Kattusseqatigiit Partiianni ilaasortaagaluartoq Abel Karlsen maanna Qaasuitsup Kommuniani Siumup gruppeani ilaasortaalerput.

Taamaasilluni Siumut ikinnerussuteqarsimagaluartoq kommunalbestyrelsemi amerlanerussuteqaqqilerpoq. Ataatsimiititalianili ataavartuni pissaanerup agguataarnera aatsaat inississinnaavoq kommunalbestyrelse nutaamik inissitsitereerpat.

- K0mmunalbestyrelsep oqarasuaatikku ataatsimiinnissaanut aggersaasoqassaaq taamaasilluta amerlanerussuteqarluta qinigaaffiup sinneranut inissinniassagatta, Qaasuitsup kommunalbestyrelseani Siumup gruppeani siulittaasoq Karl Kristian Kruse nalunaarpoq.

Kommunalbestyrelsemi Siumut maanna aqqaneq marlunnik ilaasortaatitaqalerpoq Inuit Ataqatigiit, Atassut, Demokraatit aamma Kattusseqatigiit katillugit qulingiluanik ilaasortaatitaqalersut.

Siumut ikinnerussuteqaleraluarpoq partiit sisamat suleqatigiilermata ilaasortamillu ataatsimik amerlanerussuteqaqqalaarlutik amerlanerussuteqaleraluarlutik.

Timooq Mølgaard aamma Abel Karlsen apriilip aappaani kommunalbestyrelsemut qinersinissami Siumut sinnerlugu sassarniarput.