Siumut: Alcoa immikkut inatsisiliuunneqarsimasariaqaraluarpoq
- Inatsit suliniutinut annertuunut tamanut atuuppoq. Paragrafit qulinga - sulisunut tikisitanut akissarsiakitsinut tunngasoq - qaqutigorsuaannaq atuussinnaasariaqarpoq, inuussutissarsiorneq pillugu Siumumi oqaaseqartartoq partiimilu politikkut siulittaasup tullia Karl Lyberth oqarpoq.
Partiip isumaa malillugu qaqutigorsuaannaq pisut ilaat tassaasariaaarpoq Maniitsup eqqaani Alcoap suliniutaa. Soormita?
- Alcoa suliassaq angisoorujussuuvoq Alcoalu tassaavoq Kalaallit Nunaanni sulisut akissarsiaat pillugit isumaqatigiissutit qaffasippallaartut taakkulu kissaatigaat nunani allani akissarsiaasartut atuutsinneqarnissaat, Karl Lyberth akivoq.
Taassuma partiia isumaqarpoq suliassanut angisoorujussuarnut soorlu Alcoap suliniutaanut tunngasunut immikkut inatsiseqartariaqartoq, Siumut isumaqarmat sulianut allanut taanna assersuunneqarsinnaanngitsoq.
Siumut taamaammat isumaqarpoq sulianut angisuunut inatsimmi akissaatit pillugit isumaqatigiissummut tunngasoq aqqutigalugu 'sulisartut akikitsut' atorneqarnissaat akuerineqartoq, aamma SIKp isumaqatigiissutaani akissarsiat appasinnerpaat aallaavigineqartussaagaluartut.
Tamanna IA-mit isumaqatigineqanngilaq.
- Siullermik isumaqarpunga sulisartut akikitsuunissaat anguneqanngitsoq naak taama oqaatiginiarneqartaraluartoq, inuussutissarsiornermut ataatsimiititaliap siulittaasua Naaja Nathanielsen IA-meersoq oqarpoq.
Taamaakkaluartoq taanna isumaqarpoq selskabi sorleq pineqarnersoq najoqqutaralugu inatsiliortarnissaq tulluartuunngitsoq.
- Taava imatut oqarniarpat: Ilissi akikitsunik sulisoqarniaritsi allat inatsisit malissavaat? Isumaqarpunga nunatsinni kattuffiit isumaqatigissagaannga oqaruma suliamiit suliamut isumaqatigiinniartoqartarsinnaanngitsoq. Tamanut atuuttussanik inatsiseqartariaqarpoq suliaqarniartut oqartussaasullu tamarmik tunaartassaannik, Naaja Nathanielsen oqarpoq.
Sulianut angisuunut inatsit tallimanngormat akuerineqarpoq naalakkersuisooqatigiit Atassut ilanngullugu tapersiisoralugit. Siumut kisimi taasinngilaq.
